- Publika iha: 24 Março 2014
Deputadu Antoninho Bianco, hateten parlamentu seidauk bele instala radio no televizaun iha Parlamentu Nasional tanba laiha orsamentu ba planu ida ne’e.
“Uluk tempu Governu AMP nian hanoin, katak tenke halo, halo estudu komparativu ba rai bara-barak, haruka tekniku sira ba estajiu iha Brazil fila mai atu harii televizaun, maibe to’o agora seidauk,” Deputadu husi bankada Fretilin ne’e hateten, iha Parlamentu Nasional.
Nia dehan, atu instala radio no televizaun presiza ema ne’ebe iha konesementu klean kona ba area ida ne’e.
Aliende ne’e nia dehan, obstaklu seluk ba instalasaun radio no televizaun, espasu parlamentu atual la sufsiente.
“Karik proximu fali ona, tanba agora dadauk ne’e laiha orsamentu preve,” nia dehan.
Entretantu Deputadu Pedro da Costa Martires, hateten instalasaun radio no relevizaun parlamentu importante tebes, tanba bele desimina informasaun ba povu kona ba servisu parlamentu nian.
“Ami propoin atu publika ba iha publiku tan ne’e foin dadauk iha Orsamentu Jeral Estadu 2014 nian iha ne’e aprova ona website parlamentu nian atu hato’o aktividade ba iha publiku ,” Deputadu Martires hateten.
Deputadu ne’e, hateten website lansa tiha ona maibe ema asesu sei limitadu, tanba ema ne’ebe iha internet mak foin bele asesu.
Entertantu Vise Prezidenti Parlamentu Nasional, Deputadu Aderito Hugo, informa planu ida ne’e tama iha pakote kooperasaun ho Asembleia da Republika Portugal ninian.
“Ita bo’ot sira hatene espasu ida agora ne’e la sufsiente ba unidade sira ne’ebe ejiste hela,” Deputadu Hugo dehan.
Vise Prezidenti PN ne’e, hateten orsamentu iha hela atu halo preparasaun hodi reforsa instalasaun radio no televizaun.
“Ami tau osan para hola aparelo-aparelo ho kapasidade sufisiente atu bele sentralija foti imajen ne’ebe kualidade ne’ebe bo’ot nune’e bele transforma ba televizaun sira seluk iha liur atu foti”nia hateten.
Vise PN ne’e, esplika orsamentu ne’ebe atu halo instalasaun radio no televizaun ne’e mai husi parlamentu nian ne’ebe tama iha bem servisu.
“Hau la lembra total ne’e hira maibe iha bem servisu nian ne’ebe aloka halo kompras ba ekipamentu sira ,”Hugo dehan.