- Publika iha: 22 Julho 2014
Voluntariu sira hahu halo ona limpeza semanal iha tasi ibun Dili nian hodi koko atu hamenus lixu nebe tun hodi tama ba iha ita nia tasi.
Eventu ne'e hahu ona iha semana lima liu ba, hamutuk ho Conservation International, Dive Timor'Lorosa'e nomos organizasaun balu hosi governu nian ne’ebe dedika loron ida halo limpeza ba fatin luku nian no mos tasi ibun.
"Ne'e lao ho diak tebes, no ami hanoin tamba sa maka ita la kontinua nafatin ida ne'e hodi sai hanesan aktividade semanal nian?" hateten instrutor luku Timor Lorosa'e , Stephanie Lecoeur.
Hafoin ne'e, loja luku nian enkoraja komunidade sira iha Dili laran atu hamutuk ho sira hodi limpeza tasi ibun kada semana iha fatin nebe la hanesan.
Ba sira nebe maka iha interesse atu partisipa hotu bele ba hasoru ekipa ida ne'e iha loja Dive Timor Lorosa'e iha segunda tuku 5 lorokraik.
Kalan hahu ho grupu kikioan nebe ho ema oituan, "buat nebe furak maka bain-bain labarik sira nebe hela besik iha ami nia area limpeza nian hare no mai hamutuk halo limpeza," hateten instrutor no jestor luku nian, Luke Hessler.
Hessler no Lecoeur halo ona informasaun ho lian Tetun, no sira fahe ba labarik sira nebe mak interese ho saida mak sira halo.
Matenek nain marinha nian estima katak poluisaun-foer plastik hamate ona kriatura tasi nian liu 100,000 tinan-tinan.
Kriatura sira ne'e hetan oho hosi plastik nomos botir sira, nebe bain-bain suli hosi mota tun ba tasi no lori tempu tinan rihun ba rihun hodi rahun.
"Ita iha lixu oituan iha tasi ninin, nebe maka sei la tun ba iha tasi," hateten Hessler. "Maibe ida ne mos hanesan parte ida hodi involve mos labarik sira, ida ne'e bele halo sira hanoin saida maka sira tengki halo ho lixu."
Jennifer Godfrey, turista ida hosi Australia mai visita Dili, hateten nia rakut lixu iha uma no ba soe hanesan buat ida nebe mak diak atu nia bele halo durante nia visita.
"Labarik tomak kontribui no ema hotu halo ida ne'e, ne'e furak tebes. Ida ne'e rai hela sentimentu kontenti no mos halo tasi ibun nebe mos," nia hateten.