- Publika iha: 19 Setembro 2014
Prokurador Tribunal Distritu Baucau, Aderito Antonio Pinto Tilman eleitu sai Komisariu foun Komisaun Anti Korupsaun (KAK), hafoin Membru Parlamentu Nasional hala’o eleisaun iha Parlamentu Nasional.
Membru Parlamentu Nasional husu Komisario eleitu Aderito Antonio Pinto Tilman atu halao nia servisu ho independente tuir lei haruka hodi kombate aktu korupsaun iha Timor –Leste.
Deputadu Aniceto Longuinhos Guterres Lopes, hateten komisario eleitu ne’e iha konesementu diak kona ba servisu investigasuan nian, tanba nia hanesan prokurador iha Tribunal Distrital Baucau (TDB) durante ne’e.
“Ita hein katak komisario KAK bele hala’o nia knar ho diak tuir espetativa sidadaun Timor nian, ne’ebe hakarak seriedade, kombate korupsaun iha ita nia rai,” Deputadu Lopes esperansa, iha Parlamentu Nasional.
Nia hateten, iha Junu Parlamentu Nasional halo primeiru eleisaun ba kandidatu rua ne’ebe governu propoin, hanesan Sergio Hornai no Silverio Baptista Pinto, maibe husi kandidatu nain rua ne’e, laiha ida mak hetan votus maioria absoluta.
Tanba kandidatu nain rua ne’e husu rejigna an husi kandidatura, Membru Parlamentu husu governu atu propoin kandidatu foun.
Entaun, nia dehan, iha Konselho Ministru hala’o enkontru extra oridinario hodi hili kandidatu foun rua : Duarte Tilman atual Administrador Juis Tribunal Distrital Dili no Aderito Antonio Pinto Tilman atual prokurador Tribunal Distrital Baucau, hodi propoin ba Parlamentu.
Liu husi eleisaun segredu kandidatu Aderito Antonio Pinto Tilman manan ho votus maioria absoluta 44 husi partisipantes (deputadus) 56 no deputadu nain sia seluk laiha, tanba viajen estrangeirus.
Eleisaun ba kandidatu nain rua ne’e rasik hala’o iha dia 15 Julhu 2014 iha Parlamentu Nasional, no hafoin eleitu halo kedas tomada de pose ba kandidatu eleitu sai komisariu foun KAK ba tinan tinan hat (2014-2018) nian.
Prezidente Bankada Fretilin ne’e, hatutan nia parte duvida komisariu foun KAK ne’e sei servisu ho independente, tanba komisariu ne’e propoin husi governu.
“Agora depende ba komisariu, tenke firme servisu ho independente, imparsial tuir kompetensia ne’ebe iha no lei haruka ida ne’e mak ita hakarak,” nia esperansa.
Entretantu Deputada Maria Lurdes Bessa, fo agradese tanba iha ona komisariu foun KAK nian, hafoin fulan nia laran pozisaun ida ne’e mamuk.
“Durante ne’e nia interinu hanesan in ezersisiu mos fulan rua deit, ami haksolok tebes tanba ami konsege hili duni komisariu antes resesu,” Deputada Bessa hateten.
Nia espera, katak komisario foun ne’e bele kontinua servisu ne’ebe komisariu anterior halo ona no haforsa diak liu tan iha future, hodi kombate korupsaun iha Timor –Leste.
Iha parte seluk, eis Komisariu KAK, Aderito de Jesus Soares, hateten komisariu foun presiza kontinua mak haforsa ekipa, aprezenta lei balun ne’ebe oras ne’e dadaun iha hela parlamentu, hanesan Lei Anti Korupsaun, Lei Deklarasaun Asset no hametin servisu komisaun ho Ministrio Publiku.
“Importante mak komisariu tenke iha korajen no integridade hodi lori servisu ne’e ba oin, tenke iha korajen atu hakat ba oin iha presaun oi-oin politiku no publiku,” nia enkoraja.