- Publika iha: 14 Outubro 2014
Maske governu hasai ona orario soe fo’er nian hahu husi tuku 4:30 madrugada to’o 7:00 dadersan, maibe komunidade barak kontinua la kumpri regras ida ne’e, tanba falta informasaun.
Membru Parlamentu Nasional, Deputada Ilda Maria da Conçeicão, hateten kestaun lixu sai preokupasaun ema hotu nian durante tinan barak nia laran no to’o agora seidauk rezolvidu.
Tuir nia, ida ne’e tanba governu hasai desizaun hanesan dekretu lei inklui orario bar-barak, maibe la halo sosializasaun ba komunidades iha baze.
“Ne’e knar xefe sukus sira atu halo sosializasaun informasuan ba komunidade sira,” Deputada Conceicao hateten, iha Parlamentu Nasional.
Deputada ne’e mos husu ba governu atu haree didiak orario soe fo’er ne’ebe iha, tanba seguransa publiku iha sidade laran seidauk masimu.
“Ita hotu hatene ita nia situasan kona ba seguransa seidauk diak, la kleur ita rona joven ida mate, no ema lakon, tenke estuda didiak,” nia hateten.
Iha parte seluk, Xefe Suku Kaikoli, Hipolito Marques Sarmento, hateten sira forma ona ekipa ida iha suku laran atu halo limpeza no halo sosializasaun ba komunidade sira konba orario soe foer ne’ebe governu determina ona.
“Ami halo avizu no sosializasaun kona ba impaktu no konsekuensia husi soe fo’er arbiru,” Xefe suku Sarmento hateten.
Nia dehan, komunidade balun iha komprensaun hodi soe fo’er tuir orario ne’ebe determina, maibe balun mos seidauk. “Suku Kaikoli oras ne’e dadaun 50% moos ona husi lixu,”.
Hatan ba kestaun ne’e, Xefe Departamentu Saneamentu Distritu Dili, rekonese katak komunidade barak mak sei ulun to’os, la kumpri regras ne’ebe governu fo sai.
“Sira uja kareta tuku 9:00 -10:00 kalan mak ba soe liu –liu area Comoro, Akadiru hun, Lecidere, ami toman bei-beik e ami koalia ho sira, maibe sira ho espertu, entaun ami husik deit,” nia dehan.
Nia haktuir, iha ona dekretu lei No 33/2008 atu regula komunidade sira ne’ebe husik animal iha sidade, harii uma arbiru inklui mos soe fo’er arbiru, maibe implementasaun seidauk.
“Tanba Prezidente da Repulika sei interven oituan labele fo sansaun multa, maibe presiza halo sosializasaun, tanba ne’e ami sei halo sosializasaun hela, karik munisipiu mak sei implementa,” nia hatutan.