- Publika iha: 24 Novembro 2014
Membru Parlamentu Nasional konsidera administrasaun iha instituisaun estado sei fraku tanba koloka ema la tuir nivel edukasaun no la halo promosaun ba funsionario sira.
Deputado Antoninho Bianco, Komisaun A (Constituisaun, Justisa, Administrasaun Publika, Poder Local e Anti Corupsaun), hateten administrasaun publika instituisaun estado fraku tanba kauza husi factores oioin.
“Kuantidade ema la to’o atu servisu iha instituisaun ida, koloka ema la tuir profisaun, laiha planu ida klaru atu promove funsionario sira no barak nomeasaun politika,” dehan Deputado Bianco iha parlamentu nasional, Dili.
Nia haktuir atu garantia administrasaun publika ida forte no fo atendimentu ne’ebe diak ba povu presiza kria planu ida klaru hodi halo promosaun ba funsionario sira hanesan meus ida atu enkoraja sira halo prestasaun ne’ebe diak liu tan.
Nia lamenta tanba estado haruka funsionario sira ba eskola iha liur fila mai la uza sira ho diak atu servisu povu maibe abandona funsionario sira ne’e fo impaktu ba iha servisu administrasaun instituisaun.
Deputado Bianco haktuir tan katak frakeza seluk mak kapasidade komisaun funsaun publiku nian liu–liu ho rekursu humanu ne’ebe limitado tebes atu atende prosesu hotu liu-liu rekrutamentu funsionario, avaliasaun dezempenhu no seluk tan.
Iha parte seluk eiz Presidente Komisaun Funsaun Publika Liborio Pereira rekuinese funsionario publiku balun falta etika servisu.
“Funsionario barak falta etika, presiza ema hotu nia servisu atu dessimina lejislasaun jeral funsaun publika Timor–Leste nian ne’e oras ne’e dadaun lao hela atu funsionario sira bele iha kunhesementu.”
Presidente mos husu ba nivel diretor no xefia sira iha instituisaun estado sira atu hola parte iha atividade sosializasaun informasaun kona ba lei funsaun publika nian labele haruka deit funsionario.
Nia hatutan sira iha grupo ida ne’ebe involve husi responsabel rekursu humanu ministerio sira nian atu ajuda ministerio hodi responde ba iha problema rekursu humanu intermus salariu, rekrutamentu, promosaun no seluk tan.
Nia mos sujere ba iha ministerio ida-idak elabora planu annual formasaun nian.
Entertantu funsionario publiku ida ne’ebe lakohi publika identidade hateten sira prense ona formulario avaliasaun dala barak ona maibe to’o ohin loron sira nia salariu la sa’e.
“Ita funsionario publiku ne’e ladiak salariu la sa’e ita servisu tinan rua, lima ona mos promosaun laiha,” dehan Nia.
Nia hatutan iha lei funsaun publika kada tinan rua halo promosaun maibe realidade la akontese.