- Publika iha: 10 Dezembro 2014
Diretor ba Programa Haforsa Politika Instituisaun the Asia Foundation (TAF), Hugo Fernandes hateten, atu garantia efektividade no kualidade servisu Membru Parlamentu Nasional, kada deputadu tenke iha asesor ida.
Nia hato'o kestaun ne'e ho intensaun atu garantia kualidade kada deputadu,nune'e bainhira sira atu koalia iha plenaria, tenke halo ona diskusaun ho nia asesor.
“Senti la diak kuandu ita nia deputadu sira koalia laiha kualidade,” Diretor TAFO Fernandes sujere, iha Delta Nova, Dili.
Nia dehan, durante ne’e kada komisaun iha deit asesor ida, ne’e hatudu katak asesor ida sei la atende hotu kada deputadu iha komisaun nia laran.
“Hanesan deputadu ida tur iha komisaun ne’ebe koalia kona ba agrikultura, entaun rekruta peritus ida koalia kona ba agrikultura, edukasaun saude tenke iha apoiu sira hanesan ne’e,” nia dehan.
Hatan ba kestaun ne’e Vise Prezidente Parlamentu Nasional, Deputadu Aderito Hugo da Costa, hateten Parlamentu Nasional iha duni asesor, maibe apoiu ba legal deit koalia kona ba leis no finansas.
Tanba ne’e nia mos apoiu hanoin ne’ebe mai husi NGO sira atu kada deputadu ida tenke iha asesor ida, maibe selu asesor ida ba kada membru parlamentu ida ne’e karun tebes.
“Ne’e hanoin ida ne’ebe diak maibe asesor ida nia rate karun los,” nia hateten.
Nia dehan, ba futuru Parlamentu Nasional sei koko hanoin kona ba kestaun ne’e hodi rekruta asesor ba kada deputadu ida.