- Publika iha: 17 Janeiro 2015
Feto rezistensia, Olandina Caeiro husu ba feto foinsa’e sira labele tauk involve an iha vida politika atu bele halo mudansa ba moris feto nian iha rai laran, tanba papel nian importante tebes iha nasaun ida ne’e.
Maske partisipasaun feto iha vida politika sei iha dezafiu bo’ot, maibe nia husu, atu labele tauk kompete kuandu iha kapasidada no intelektual.
“Timor –Leste feto matenek barak, tanba ne’e feto foinsa’e sira tenke brani kompete ho mane, nune’e bele kria sensibilidade entre mane ho feto iha vida politika,” Caero hateten, iha Dili.
Importante mak, nia dehan, feto sira tenke fiar an no prepara intermus de kapasidade atu tama iha vida ida ne’e, tanba lei fo dalan.
Nia mos sujere ba foinsa’e sira, liu –liu feto atu lee barak, tanba matenek la’os deit iha universidade, maibe liu husi lee mos bele fo matenek.
Nia mos husu ba feto foinsa’e sira atu fo importansia ba edukasaun no labele hanoin kaben sedu.
“Husu ba inan sira atu eduka oan feto sira, feto ne’e la’os hola mane mak hetan moris diak, maibe sira nia moris diak bainhira iha ona paun fuan ida kaer ona iha liman,”nia dehan.
Iha parte seluk, Sekretaria Estado ba Promosaun Igualidade (SEPI), Idelta Maria Rodrigues, hateten partisipasaun feto iha vida politika iha progresu bo’ot, liu –liu iha parlamentu nasional, governu nune’e mos iha nivel distrital, maske numeru sei ki’ik.
“Hau fiar feto sira mos bele hola parte iha prosesu sira tuir mai ne’e, tanba feto matenek iha distritu barak,” nia dehan.
Nia hatutan partisipasaun iha ona progresu maibe sei la kontente deit ho progresu ne’ebe iha presiza dezempenho mos kualidade.