- Publika iha: 26 Janeiro 2015
Orsamentu Jeral Estadu (OJE) 2015 governu nafatin fo prioridade ba area infra-estrutura, tanba governu konsidera estrada no ponte iha teritoriu tomak seidauk hatudu progressu ne’ebe signifikativu.
Primeiru Ministru, Kay Rala Xanana Gusmao, hateten kualidade infra-estrutura mak bele kontribui kresimentu ekonomiku ne’ebe sustentavel no ba milloria prestasaun servisu ba povu.
Durante ne’e, Gusmao hateten, iha investor bo-bo’ot mak iha interese atu investe iha Timor-Leste, maibe kondisaun infra-estrutura mak seiduak favoravel.
“Hau sente ita hotu hakarak hili hadia infra-estrutura rai laran, komesa explora iha ita nia zona ekonomia esklusiva ne’ebe la’o dadauk,” PM Gusmao hateten, iha Parlamentu Nasioinal.
Enkuantu Membru Komisan E (infra-estrutura, transporte e komunikasaun), Deputadu Aurelio Ribeiro, konkorda governu tau nafatin prioridade ba infra-estrutura iha OJE 2015 nian.
“Ne’e razuavel tebes, tanba maske ita nia agrikultor sira bele iha produsaun diak, maibe kuandu estrada ladiak, labele asesu ba merkadu,” Deputadu Ribeiro konkorda.
Nia fo ezemplu, hanesan area turismu bele dezenvolve ho diak,maibe estrada ladiak, entaun turista sira la asesu ba iha ne’eba.
“Ne’ebe ne’e relevante tebes hodi hadia estrada iha area rural,” Deputadu Ribeiro hateten.
Entretantu Deputadu Inacio Moreira, hateten iha tinan 2014 parlamentu konsege aprova osan hamutuk $156, 413 miloens hodi hadia estrada no ponte iha teritoiru, maibe balun la’o sei faila hela.
“Tau nafatin prioridade ba infranstrutura ne’e hatudu katak governu seidauk bele resolve infrastrutura iha tempu tinan ida ho osan nebe ho montante boot ne’e,” Deputadu Moreira hateten.
Nia hatutan, iha tinan 2015 ne’e governu tau tan osan hamutuk $156,801 millioens hodi hadia infra-estruturas iha rai laran liu-liu estradas no pontes.