- Publika iha: 09 Fevereiro 2015
Membru Parlamentu Nasional konsidera atendementu iha Ospital Nasional Guido Valadares (HNGV) demora liu no pesoal saude sira hafuhu malu deit.
Deputadu Aurelio Freitas Ribeiro, hateten atendementu saude publiku komesa la’o ladiak iha kintu governu ida ne’e no rezulta pasiente balun to’o mate.
“Lolos ita bele salva, maibe tanba ho atendementu ida ne’ebe nakonu ho birokrasia no hafuhu malu deit to’o pasiente ne’e mate,” Deputado Freitas kestiona, iha Parlamentu Nasional.
Tanba ne’e nia sujere ba governu atu haree situasaun ida ne’e no buka solusaun, tanba akontese bebeik ona hahalok ida ne’e.
Nia parte kestiona ida ne’e, tanba iha loron 9 fulan Dezembru 2014 vitima Bonifacio Cardoso ne’ebe nudar ninia (Deputadu Aurelio) motorista hetan asidente trafiku hafoin fila husi deputadu nia uma ba fali nia uma ne’ebe rezulta ain tohar no ulun.
Deputadu ne’e konta, to’o iha ospital mediku balun dehan tenke halo observasaun iha ulun tanba pasiente muta, maibe medikus sira ne’ebe atende deside halo operasaun deit ba ain ne’ebe tohar.
“Hafoin halo operasaun ba ain tohar, vitima laiha mudansa ba nia kondisaun, entaun familia ejiji halo CT-Scan no ikus mai detekta ran iha kakutak no tenke halo tranferensia ba rai liur, maibe ho prosesu no atendementu ne’ebe duun malu, entaun vitima la konsege salva no mate,” nia esplika.
Iha fatin hanesan, Prezidente Komisaun F (saude, edukasaun, veteranus, Igualidade jeneru), Virgilio da Costa Hornai, sujere presiza hadia jestaun atendementu, tanba Parlamentu Nasional aprova ona orsamentu hodi hadia sistema ne’e.
“Ita iha osan atu sosa aimoruk, selu espesialista sira, maibe ita nia maneira atendementu no boa vontade mak laiha, presiza hadia ida ne’e,”nia sujere.
Nia konsidera, mal atendementu kontinua akontese tanba lideransa iha setor saude taka an ba kritika no reklamasaun sira ne’ebe husi publiku atu hadia sistema sira ne’ebe iha.
Entretantu Vise Ministra Saude asuntu etika no prestasaun servisu, Natalia de Araujo, hateten dadaun ne’e Ministerio Saude servisu hamutuk ho HNGV fo hela kapasitasaun ba professional saude sira kona ba etika no atendementu ne’ebe dignu ba iha komunidade sira liu –liu pasiente.
“Atu muda sira nia atitude atu fo asistensia ne’ebe diak ba ita nia komunidades,” nia hateten.