- Publika iha: 07 Outubro 2015
Segundu Komandante Jeral Polisia Nasional Timor-Leste (PNTL) ,Komisariu Faustino da Costa, hateten situasaun rai laran nafatin kontroladu, hafoin Empenhamentu Operasaun Conjunta (EOK) tiru mate ona Paulino Gama alias Mauk Moruk (MM).
Mesmu nune’e, nia dehan, PNTL sei aumenta volume operasaun iha fatin hotu-hotu, liu-liu iha fatin prinsipais sira.
“Ita monta seguransa iha embaxada sira, edifisiu prinsipais estadu nian no polisia mos halo movimentu iha estradas,” Komisariu Costa hateten, iha Kaikoli, Dili.
Enkuantu komando munisipais, nia dehan, mos asegura seguransa iha area remotas no iha postu administrativu sira.
Nia informa , movimentu transportes (kareta no motor) iha parte leste nian la’o ho diak, tanba hetan seguransa masimu husi polisia.
Tanba ne’e, nia husu, ba komunidades atu kolabora ho parte seguransa hodi kria paz no estabilidade iha rai laran.
Enkuantu matebian Paulino Gama alias MM (lider Konselho Revolusioner Maubere (KRM)) hetan tiru husi EOC to’o mate, iha Fatulia, postu administrativu Venilale, iha dia 08 Agostu 2015.
Matebian MM ho nia membrus hetan mandatu kapturasaun, tanba kontra estadu hodi tiru kanek membrus PNTL hamutuk nain lima, iha 15 Janeiru 2015 no membru Falintil-Forsa Defeza Timor –Leste nain ida, iha 28 Junu 2015.
Iha parte seluk Vise Diretor organizasaun Fundasaun Mahein (FM), Joao Almeida Fernandes, husu ba PNTL atu mantein seguransa iha rai laran, mesmu agora dadaun situasaun kontroladu.
“Liu-liu hametin kontaktu ho komunidades, koalia ho sira, oinsa mak bele garantia paz no estabilidade iha rai laran,” Fernandes sujere.