- Publika iha: 14 Março 2016
Komisaria Joana M. Dulce Vitor, hateten Comisaun Nasional Eleisaun (CNE) konsege regista ona partidus politiku hamutuk 29 ne’ebe pronto ona atu konkore iha eleisaun 2017 tuir mai.
Husi partidus 29 ne’e, nia dehan, partidu 3 mak foun, foin mak harii no 26 seluk tuan hotu. Partidu hirak ne’e konsege halo ona registu legal iha Tribunal Rekursu antes mai iha CNE.
“Partidus foun hirak ne’e hotu-hotu priense duni kriteria ne’ebe mak iha no sira merese atu konkore iha eleisaun 2017,” Comisaria Dulce Vitor hateten, iha nia knar fatin, Kaikoli, Dili.
Nia informa, partidus foun tolu ne’e mak Movimentu Liberta Povu Maubere (MLPM), Centro Acao Social Democrata Timorense (CASDT), inklui Partidu Unidade Dezenvolvementu Demokratiku (PUDD).
Kompara iha tinan 2012, nia dehan, total partidus ne’ebe regista iha CNE hamutuk 26 deit no hafoin halo koligasaun entaun total 21 partidus mak konkore iha eleisaun 2012, e iha tinan 2017 iha 29 no bele atinji to’o 30 partidus, tanba ida sei prosesu hela.
“Partidu Libertasaun Popular (PLP) sei iha prosesu registrasaun nia laran, seidauk tama iha lista,” nia hateten.
Iha fatin seluk Deputadu Agustino Lay, hateten konstituisaun fo dalan ba ema individu ou grupu iha direitu atu harii partidu hodi kompete iha eleisaun, maibe partidu ne’ebe mak harii tenke priense kriteria ne’ebe determina ona husi lei.
“Ema hotu-hotu iha direitu ba ida ne’e, tanba partidu hotu-hotu lori nia programas ba povu, no povu mak sei deside ne’ebe mak diak,” Deputadu Lay hateten.
Tanba ne’e, nia husu ba lideransa partidus hotu, tenke focus ba sira nia programa wainhira iha tempu halo kampanha, labele buka atu insulta malu no hatuun fali partidus seluk nia dignidade.
“Ba baze karik koalia programa ne’ebe trasa ona, labele buka atu provoka malu fali,” nia sujere.
Entretantu komunidade Julia Maria Noronha, hateten partidus 29 ne’e barak demais, enkuantu Timor rai ne’ebe ki’ik ho total populasaun ne’ebe kiik mos, ida ne’e sei fo impaktu ba gastus orsamentu estadu nian.
“Ita hasai osan saugate deit, tanba to’o ikus mai partidu ida ou rua deit mak povu hili, maibe osan estadu nian sai lubuk ida ona,” nia preokupa.