Governu tenke hadia lampu sinais tranzitu

Realidade lampu sinais tranzitu barak mak la funsiona iha capital Dili, motorist sira husu ba governu liu husi Diresaun Nasional Transporte e Terestres (DNTT) atu hadia lalais lampu hirak ne’e, nune’e bele prevene asidente trafiku.

“Hau hakarak husu ba iha governu hadia lalais lampu merah sira ne’e, atu nune’e kareta no motor sira labele hetan asidenti bei-beik,” sujere Motorista Abrao Gusmao Freitas, (28/05), iha Palacio Governu oin.
Tuir Motorista ne’e, dalabarak  asidenti mosu tanba impaktu husi lampu sinais tranzitu la funsiona ho diak, no halo kareta no motor sira tama arbiru deit .
“Dala ruma ema la’o mos labele tanba lampu merah la funsiona, difikulta ba ema la’o ain atu hakat ba iha estrada sorin,” Motorista Freitas kestiona.

Entertantu Prezidente Komisaun B Parlamentar, Deputadu Duarte Nunes dehan, lampu sira ne’e la funsiona ho diak tanba impaktu husi eletrisidade ne’ebe lakan mate iha kapital Dili.

“Polisia sira hatene ona ,hau kontaktu ho Sekretariu Estadu Seguransa dehan, sira iha ona atensaun ba iha kruzamentu sira ne’e, Polisia sira sempre ba hare ne’eba,” Deputadu Nunes dehan.

Iha sorin seluk Deputadu Francisco Jeronimo, sujere ba iha DNTT, atu normaliza lalais lampu sinais sira ne’e, atu nune’e labele kria asidenti barak liu tan.

“Karik ahi mak ladiak , diak liu koalia ho parte Sekretariu Estadu Eletrisidade nian para hadia lina sira ne’ebe mak iha, nune’e lampu sira funsiona fali ho diak,”Deputadu Jeronimo sujere.