Lisensa maternidade, la afeta ba vensimentu

Tuir Lei Kodigu Labarol foun (No. 4/2012), iha artigu 59 ne’ebe koalia kona ba lisensa maternidade katak, trabalhadora sira iha direitu ba lisensa maternidade durante fulan 3, no durante ne’e mos kompania tenke selu sira nia salariu kompletu tuir kontratu ne’ebe iha.
“Lei UNTAET nian artigu 11 kona ba modalidade espesial ou lisensa maternidade fulan 3, maibe salariu selu deit 2/3, katak trabalhadora ida nia salariu kada fulan U$100, nia sei simu deit $66.66 centavus kada fulan, maibe lei kodigu laboral foun ne’ebe iha, salariu minimu $115, nia nafatin simu salariu $115 maske iha hela lisensa maternidade,” hateten Prezidente Konfederasaun Sindikatu Timor-Leste (KSTL) Jose da Conceição, (08/06), iha Colmera, Dili.

Prezidente KSTL ne’e dehan, durante tinan 10 nia laran governu faila defende direitu trabalhadora sira nian, e sira kontinua sai vitima ba lei ne’ebe iha, hanesan realidade ne’ebe akontese trabalhadora sira bainhira lisensa maternidade, sira nia salariu koa 2/3, e balun mos la selu totalmente.
“Ami nia hare lei kodigu laboral foun ne’e diak, fo duni protesaun ba trabalhadora,” dehan Prezidente KSTL ne’e.

Entretantu Prezidente Board Rede Feto, Ivete de Oliveira dehan, espera katak ho lei kodigu laboral foun ne’e bele fo duni benefisiu ba trabalhador feto (lisensa maternidade) ne’ebe durante ne’e ladun hetan atensaun husi governu.

“Ami husu ba governu atu bele tau atensaun no implementa didiak lei foun ne’e, nune’e bele garantia trabalhadora sira nia direitu, liu-liu bainhira sira cuti partus labele koa sira nia salariu,” Prezidente de Oliveira sujere.