- Publika iha: 28 Janeiro 2017
Membru Parlamentu Nasional husu ba governu atu kontrola Loja Dolar Ida (one dolar shop) ne’ebe dadaun ne’e buras iha kapital Dili, tanba sasan ne’ebe fa’an iha loza ne’e laiha kualidade.
Membru Parlamentu (MP) Jacinta Abucau Perreira, hateten governu iha dever absolutamente atu kontrola, tanba konsumidores iha direitu atu hetan sasan ne’ebe kualidade.
Enkuantu Parlamentu rasik aprova ona lei protesaun konsumedores nian, tanba saida mak lei ne’e seidauk implementa.
“Komunidade ba hobur, tanba folin baratu, ita labele fo sala konsumideores maibe ema sira ne’ebe fa’an ne’e, governu tenke kontrola,” nia kestiona.
Alende sasan laiha kualidade, nia dehan bele hamate mos vendedores sira seluk ne’ebe fa’an sasan ho folin normal.
Nia informa, Loza Dolar Ida agora dadaun eziste iha parte suku Fatuhada, Kampung Merdeka inklui iha Bairo-Pite (Hudi Llaran) no iha fatin seluk tan e maioria negosiante husi Cina.
Iha fatin seluk Sekretaria Estadu ba asuntu Parlamentar, Maria Terezinha Viegas, konsidera asuntu ne’e importante no governu sei toma responsabilidade.
Tanba nia rekonese, katak wainhira konsumedores sira hasai osan, sira mos presiza hetan sasan ne’ebe ho kualidade.
“Ami sei hato’o asuntu ne’e iha reniaun Konselho Ministru hodi haree to’ok asuntu ne’e,” SE Viegas hateten.
Kona ba lei protesaun konsumidores, nia hateten seidauk bele implementa tanba governu sei halo uluk sensibilizasaun ba komunidade no negosiante sira molok tama ba vigor.
Iha parte seluk komunidade Esmeralda da Costa, hateten komunidade ho kbi’it nato’on buka liu mak loza sira hanesan ne’e, tanba baratu maske kualidade laiha.
“Hau ba sosa duni, maibe sasan sira ne’e laiha kualidade duni,” nia hateten.