- Publika iha: 01 Fevereiro 2017
Husu ba Polisia Nasional Timor-Leste atu aplika multa ne’ebe todan ba motoristas ne’ebe lori motor ho kondisun lanu.
Lori kareta ou motor ho kondisaun lanu fo spasu hodi akontese soke malu iha estrada no iha posibilidade bele kauza ba mate ou kanek todan. Tanba bainhira lanu, liu-liu jovens halai ho velosidade maka’as no la uja seat belt, entaun ida ne’e risku bo’ot ba sira.
Membru Komisaun E (infra-estruturas, transportes no komunikasuan), Manuel de Castro Pereira hateten tuir lei ema ho kondisaun lanu labele lori motor no kareta, no sekarik mak balun kontra lei, polisia kaer no kastigu sira, tanba bele fo perigu alende ba sira nia aan mos bele hamate ou hakanek ema seluk.
“Polisia tenke ezekuta lei ne’ebe iha, tenke aplika multa ne’ebe todan to’o $200-300 hanesan ne’e, nune’e bele evita,” MP Pereira hateten, iha Parlamentu Nasional.
Nia husu ba Polisia Tranzitu atu halo seguransa durante 24 horas nia laran iha postu tranzitu sira ne’ebe espailha ona sidade laran.
Alende ne’e husu mos ema hotu, liu-liu joven sira atu kuidadu aan bainihra halai motor no kareta durante loron bo’ot, labele lori motor no kareta kuandu lanu, nune’e bele prevene aan husi asidente ne’ebe la espera.
Entretantu Komandante Tranzitu Munisipiu Dili, Inspektor Matias da Silva, rekonese katak dalabarak asidente trafiku akontese tanba lanu hela sira lori kareta no motor.
“Maibe ami seidauk iha alcohol test hodi test kadar alkohol ne’e hira, ida ne’e mak sei iha problema hela,” Komandante da Silva hateten.
Tuir nia, so ho alcohol test mak bele detekta ema ne’e lori kareta ga motor ho kondisuan lanu ou la’e. “Ita labele kondena ema sekuandu ita horon deit ema nia iis,” nia dehan.
Organizasuan Mundial Saude (OMS) rekomenda Blood Alcohol Concentration (BAC) limit 0,05 atu tuun liu ida ne’e ba driver jovens no ba ema foin lori kareta ou motor iha Timor-Leste.
Enkuantu, iha implementasaun leis (drink-driving law, speed limit law, motorcycle helmet law no seluk tan) Timor-Leste iha rating ne’ebe tuun liu.