Sexta, Março 29, 2024
Total visitors: 766366

Kompania bebidas Heineken apoia kapasete 300 ba Polisia Tranzito Nasional hodi fahe ba publiku liu-liu eskola oan sira.

Kompanhia Heineken apoia 300 kapasete ba Polisia Tranzito Nasional hodi fahe ba estudante sira

General Manager Kompania Heineken iha Timor Dinay Matur, hateten kompania fo apoia kapasete ba POLTRANS tanba sira mos iha programa kona ba seguru iha dalan.

Tanba ne’e, kompania konsidera kapasete nudar fasilidade importante salva vida nian wainhira ema lori ga sae motor tenke uza kapasete.

“Kompania mos tau importansia kona ba safety road, tanba ne’e ami suporta fasilidade sira ne’e,” nia dehan.

Nia hateten dehan, Timor nudar nasaun ne’ebe mak risku bo’ot ba asidente trafiku, entaun uza kapasete bele ajuda tebes banhira halai motor.

Alende apoia kapasete, nia dehan sira mos apoia kadernu rihun ida no lapijeira rihun ida, laptop hitu inklui kamera digital ida.

Nia hatutan, kaderneta no lapijeira hirak ne’e atu fahe ba estudante sira wainhira POLTRANS ba halo sosializasaun regras tranzito nian iha eskola sira.

Nia optimista, katak ajudus hirak ne’e iha nia valor hodi kontribui ba salva vida nian.

Iha fatin seluk Komandante Jeral Polisia Nasional Timor –Leste (PNTL), Komisariu Julio Hornai, agradese ba kompania Heineken ne’ebe oferese ona fasilidade hirak ne’e.

Nia espera, membru sira bele utiliza fasilidade ida ne’e tuir vizaun ne’ebe instituisaun trasa ona asaun hamenus numeru asidente iha rai laran.

“Ita espera katak kooperasaun hanesan ne’e bele la’o ho diak,” nia dehan.