- Publika iha: 14 Junho 2017
Grupos produtor ne’ebe halo produsaun ba produtus tradisional ejiji ba governu atu re-ativa atividade Bazaar fin da semana (Dili Weekend Market) fo espasu ba sira fa’an sira nia produtus hodi hetan rendimentu.
Koordenadora grupo tais Hadadi, Elda Fereira de Oliveira hatete fulan neen ona sira lahetan rendimentu tanba governu hapara programa weekend market e sira nia produtus la fa’an.
“Ami hein katak governu loke fila fali programa ne’e, nune’e ami bele fa’an fali ami nia produtus,” nia esperansa, bainhira partisipa iha feira Paskua ne’ebe organiza husi Fundasaun Alola, iha Marcarenhas, Dili.
Nia hatete, rendimentu ne’ebe sira hetan iha kada feira, sira fahe ba membru sira hodi selu fali oan sira nia eskola no sosa nesesidade baziku familia nian lor-loron.
Nia informa, sira nia grupo produs hanesan soru tais, halo pasta, karteira, kurtina janela no odamatan ho kombinasaun tais inklui halo pasta ho lixu plastiku sira hanesan kafe nia falun.
Alende ne’e, nia sente preokupada ho prezensa empreza Cina iha Timor, fo ameasa bo’ot ba empreza ki’ik sira iha rai laran tanba sasan ne’ebe sira fa’an folin baratu tebes.
Entretantu grupo Moris Foun arte zenatu, homan Maubara munisipio Liquisa, Virginia Serão hateten programa Dili Weekend Market ne’e ajuda tebes sira, maske dala ruma hetan rendimentu ki’ik.
“Governu tenke kria fatin permanente ida ba ami atu bele rai ami nia protudus, nune’e turista sira mai bele vizita fatin ne’e,” nia sujere.
Nia hateten, sira nia grupo kontinua produs produtus hodi hein feira ruma husi governu inklui sosiedade sivil hanesan Fundasaun Alola kada tinan loke feira dala rua hodi sira bele fa’an sira nia produtus.
Iha tinan 2016, governu liu husi Ministerio Komersio Industria e Ambiente (MCIA) hamutuk ho Administrasaun Dili realiza atividade Bazaar fin da Semana (Dili Weekend Market), ho objetivu atu fasilita grupos industria tradisional
ki’ik atu bele fa’an sira nia produtu hodi hetan rendimentu ba sira nia aan, maibe atividade ne’e la kontinua.
Iha parte seluk, Prezidente Komisaun D (ekonomia e dezenvolvimentu), Jacinta Abu Cau Pereira hatete ne’e programa ne’ebe diak tebes ba grupo produtor sira, e governu tenke buka fatin atu bele re-ativa.
“Ne’e kapas los tanba ita nia grupos produtor sira bele fa’an sira nia produtus iha fin da semana, hau lahatene tanba sa mak governu la kontinua,” nia dehan.
Nia dehan, komisaun sei konfirma ho governu atu re-ativa fali programa ne’e tanba grupos produtor iha antusiasmu partisipa.