Kapital falta espasu atu harii lixu fatin tanba komunidade la fo fatin

Xefe Departementu Saneamentu Munisipiu Dili, Domingos dos Santos Suriano hateten governu esforsu atu halo lixu fatin iha kapital Dili, maibe fatin laiha tanba komunidade la fo espasu.

Alende ne’e, nia dehan ba tinan 2017 governu laiha programa atu halo lixu fatin tanba laiha orsamentu.
“Komunidade la fo fatin atu halo lixu fatin, ida ne’e kestaun bo’ot ida mai ami,” nia hateten, iha Dili.
Nia hateten, iha tinan hirak liu ba saneamento munisipiu Dili kria ona fatin lixu barak maibe komunidade barak mak lakohi ho razaun besik liu sira nia uma, entaun sira harahun tiha lixu fatin hodi loke fali sira nia kios.
“Agora sira ejiji lixu fatin, maibe tinan ne’e labele halo lixu fatin iha bairo sira, tanba osan laiha,” nia hateten.
Lixu fatin ne’ebe agora iha, nia dehan ne’e husi programa PNDS (Programa Nasional ba Dezenvolvementu Sukus) nian ne’ebe uluk halo lixu fatin iha bairo sira iha capital Dili.
“Programa halo lixu fatin ne’e hakotu iha 2010, no mosu fali programa lixu fatin ida movel (hatur) ne’e deit, nakonu tiha tinggal ba dada deit,” nia informa.
Nia rekonese katak kauza husi fatin lixu ne’ebe menus, komunidade sira soe foer iha fatin-fatin inklui iha fatin publiku mos.
“Ami husu ba komunidade sira iha capital Dili, atu labele soe foer arbiru, tau deit iha imi nia saku or fatin ne’ebe govenru prepara ona,” nia apela.
Iha parte seluk Diretor Ezekutivu Organizasuan Luta Hamutuk (LH), Jose Alves da Costa hateten, fatin lixu ne’ebe agora iha ne’e seidauk sufsiente no presiza tan tanba iha bairo barak mak komunidade sira soe foer arbiru deit.
“Tanba konsumidores barak liu, ita tenke tau atensau para sira bele soe lixu iha fatin no presiza halo renovasaun fali ba lixu fatin no seguru, nune’e asu labele dada sai foer ne’ebe mak iha,” nia hateten.
Nia espera, katak VII Governu foun bele hare kestaun ida ne’e, tenke aumenta tan lixu iha bairo-bairo sira no komunidade sira tenke uja ho responsabilidade.
Entrertantu Komunidade Maria Babo, sente triste tanba sidade Dili nakonu ho foer husi loron ba loron foer aumenta barak iha fatin-fatin, tanba komunidade laiha konsiensia.
“Husu ba governu tenke halo lixu fatin iha bairo-bairo, nu’une ami bele tau foer hamutuk. Husu mos ba maluk sira tenke tau foer hamutuk no labele soe foer arbiru,” nia sujere.