- Publika iha: 17 Novembro 2017
Sekretario Jeral Organizasaun Popular Mulher Timor (OPMT), Merita Alves hateten prosesu intervista no hakerek livru kona ba istoria kontribuisaun feto nian luta ba libertasaun iha ona faze finalizasaun no sei halo lansamentu iha tinan ida ne’e nia rohan.
Nia rekonese, katak lori tempu naruk tebes atu finalize livru ida ne’e tanba presiza halo intervista ida ne’ebe klean no la fasil atu buka faktus sira kona ba feto nia luta.
“Ami hasoru difikuldade, maibe ami konsege intervista feto 800 husi frente armada, klandestina no luta externa nian, ami kompila hotu ona e agora dadaun iha hela faze koresaun ikus,” nia hateten iha Hotel Novu Turismu, Dili.
Nia hateten, inisiativa hakerek livru istoria luta feto nian ne’e mai husi OPMT rasik, atu ema labele ignora no haluhan kontribuisaun feto nian iha luta libertasaun.
Nia parte sente triste, bainhira haree laiha istoria no figura feto Timor nian iha museum rezistensia kompara ho joventude 12 de Novembru ne’ebe partisipa ikus iha memoria liu-liu figura iha museum.
“Feto laiha dokumentu ida atu komprova sira nia partispasaun iha luta ba libertasaun, ita haree iha auzensia total istoria feto nian iha prosesu ida ne’e nia laran,” nia triste.
Alende ne’e, nia dehan iha serimonia nasional sira ne’ebe povu Timor selebra nunka temi figura feto sira nian ba publiku, liu –liu jerasaun foun sira atu hatene tuir.
Prosesu elaborasaun livru ne’e rasik, hahu iha tinan 2010 ho apoiu finanseiru husi governu liu husi fundus sosiedade sivil no orsamentu Fundrising husi OPMT nian rasik.
Iha parte seluk, Presidente Board Rede Feto Judit Ximenes hateten livru ida ne’e importante tebes ba jerasaun foun sira atu hatene, tanba iha informasaun barak koalia kona ba feto sira nia knar iha durante luta.
“Atu fanun konsiensia jerasaun foun sira nian, kontinua luta liberta povu ne’e husi kiak no mukit,” nia hateten.
Alende ne’e, koalia mos kona ba razaun feto la kaer kargu xefia sira iha momentu rezistensia, nia dehan tanba risku bo’ot tebes ba feto sira nia seguransa.