Sexta, Março 29, 2024
Total visitors: 766366

Kada loron Ospital Roo Ark da Paz simu pasiente hamutuk ema nain rihun ida resin hodi halo konsulta no ezaminasaun ba sira nia moras.

Kada loron Ospital Roo Ark da Paz simu pasiente hamutuk ema nain rihun ida resin hodi halo konsulta no ezaminasaun ba sira nia moras.

Dean of The Sea Hospital Ark Peace, Sun Tao hateten depois abertura iha semana kotuk, sosiedade barak mak vizita roo ne’e hodi halo tratamentu ba sira nia moras.
Nia dehan, sira iha ekipamentus mediku ne’ebe kompletu no espesialista ba moras oi-oin hodi bele halo diagnostika ba pasiente sira no fo konsulta.
“Loron ida, ami atende ema mais ou menus rihun ida resin ne’ebe sofre moras oi-oin, maibe barak liu mak moras laran, rins no matan,” nia hateten iha Ponte Kais, Dili.
Alende fo konsulta iha tempu dader, nia dehan sira mos halo operasaun ba iha pasiente sira iha kalan.
Nia informa, loron ida sira halo operasaun ba iha ema nain 6-7 ne’ebe sofre moras Tumor la ganas no hasai mos kilat musan iha ema nia isin, liu –liu veteranus sira.
“Ami sente Timor –Leste ema barak mak moras, entaun presiza halo konsulta, maibe atu mai fali depende ba iha kordenasaun entre governu Timor –Leste no Ggovernu Cina,” nia hateten
Alende fo tratamentu ba sosiedade ne’ebe iha Dili laran, sira mos visita postu Administrativa Atauro hodi fo tratamentu mos ba iha komunidade sira iha Atauro.
Roo Militar ho numeru 866 husi nasaun Cina ne’e to’o iha dia 13 fulan Dezembru. Roo ne’e fo atendimentu saude gratuita ba sosiedade Timor -Leste durante loron walu (14-21) fulan Dezembru 2017.
Entretantu, Ministru Defeza no Seguransa Agustinho Siquera Somotxo hateten visita roo ne’e mai iha Timor –Leste hanesan parte ida husi kooperasaun entre militar Cina no militar Timor –Leste (Falintil -Forsa Defeza Timor –Leste) nian.
“Roo ne’e ho nia ekipamentus ne’ebe kompletu liu ita nia ospital nasional, entaun ita liu –liu veteranus, governante sira tenke aproveita hodi halo konsulta,” nia hateten
Nia dehan, alende oferese tratamentu saude gratuita ba komunidades, sira mos fo apoiu ba dezenvolvimentu defeza nian hanesan apoiu tekniku professional, ekipamentus militar no prinsipalmente formasaun.
Nia hateten, governu sei kontinua kria relasaun ho militar Cina liu husi akordu ne’ebe asina husi Ministru Defeza Seguransa no governu Cina iha area defeza nian.
Tuir observasaun Jornalista TDW nian iha tereinu, haree katak iha loron primeiru to’o loron walu, dadersan deit ema rihun-an forma ona iha portaun ponte kais atu tama ba ro laran hodi halo konsulta ba sira nia moras. Komunidade sira ne’e la’os deit husi Dili, maibe barak mos mai husi munisipio sira ne’ebe besik.