- Publika iha: 15 Janeiro 2018
Komadante Polisia Munisipio Dili, Superintendente Asistente Euclides Belo hateten velosidade halai kareta ga motor iha Dili laran 40km deit e labele liu husi ida ne’e.
Nia dehan, durante ne’e kondutor sira lori kareta ho velosidade maximu ( liu husi 40km) ne’ebe rezulta ema mate no kanek e sira ne’e submete ba prosesu legal nian ne’ebe haktuir iha kodigu penal.
Nia hato’o kestaun ida ne’e, relasiona ho akontesementu bis Estrela ne’ebe baku fila iha Kakaulidun (Dili)foin lalais ne’e, tanba halai ho velosidade maximu.
Nia informa, akontesementu ne’e rezulta pasajeirus ida mate fatin no nain nen seluk kanek.
“Kondutor kareta tantu taksi, mikrolet, bis no kareta privado bainhira halai iha capital Dili, velosidade mak 40km e labele liu,” nia hateten, iha Dili.
Maibe, nia hateten bainhira fora husi Dili, bele halai to’o 60km e tanba ne’e husu motorista sira kontribui.
Nia hateten, kondutor ne’e iha karta kondusaun kompletu, maibe tanba neglijensia halai ho velosidade maximu no la konsege kontrola bolante.
Nia dehan, bis ne’e ho xapa matrikula 36727 no nia destinasaun Dili –Viqueque.
Iha parte seluk, Mediku iha sala emergensia Ospital Nasional Guido Valadares (HNGV), Sidonio João hateten sira simu vitima hamutuk nain 7, e ida mate iha fatin akontesementu enkuantu nain neen seluk konsege hetan tratamentu.
Depois de simu tratamentu, nia hateten sira fila kedas ba uma tanba ho kondisaun kanek kmaan hanesan ruin naksalak no balun trauma deit.
Portantu dadus HNGV, total asidente trafiku ne’ebe akontese durante loron bo’ot (Natal no Tinan Foun) hamutuk 30 resin (balun mate).