SEJT: Rekrutamentu Ba Servisu Iha Korea No Australia Tenke Transparensia

Sekretario Estadu Joventude no Trabalho (SEJT), Nivio Magalhaes husu atu prosesu rekrutamentu joven sira atu ba servisu iha Korea no Australia tenke ho honestu no transparansia.

Nia dehan, tenke haruka ema ne’ebe hatene duni lian Korea no English, iha konesementu no kapasidade ne’ebe diak tanba sira ne’e reprezenta nasaun Timor-Leste ba servisu iha ema nia rain.
‘’Foin lalais ne’e, hau halo despedida ho trabalhadores 37 ne’ebe ba servisu iha Korea, hau nota buat balun ne’ebe ita persiza hadia,” SE Magalhaes hateten, iha Dili.
Atu hadia ida ne’e, nia presiza relatorio kompletu hodi bazeia ba faktus no evidensia ne’ebe iha mak hodi bele foti desizaun ida ne’ebe bele fo benefisia ba trabalhador sira.
Nia hateten, governu Korea fornese kursu lian Korea ba trabalhadores Timor oan ne’ebe hakarak ba servisu iha ne’eba.
Tanba ne’e, nia importante duni atu haruka Timor oan ne’ebe hatene duni lian Korea inklui iha konesementu luan hodi ba servisu iha ne’eba.
Kada tinan, nia dehan depende ba kuota ne’ebe Governu Korea fo mai Governu Timor-Leste, maibe ba tinan ida ne’e sei haree no hein informasaun husi Korea, molok fo avisu ba kandidatu trabalhadores atu enxe kriteria ne’ebe iha.
“Selesaun ba trabalhadores sei halo ho transparansia, loke ba publiku, hili sira ne’ebe bele duni no iha kapasidade, tanba sira la’os lori deit sira nia naran no la’os ba atu buka osan deit maibe ne’e lori imajen nasuan Timor –Leste nian,” nia hateten.
Entretantu Partisipante kursu lian Korea, Tome Antonio Alves preokupa tanba iha balun ladun hatene lian Korea ho diak maibe sira ba hotu servisu iha Korea.
“Ita tuir test ne’e hanesan koko sorte deit, tanba realidade ema ida hatene diak liu nia la liu no ida ne’ebe ladun hatene, nia mak liu fali,” nia preokupa.
Tanba ne’e, nia sujere ba govenru liu husi Sekretariadu Estadu Joventude no Trabalho, tenke halo selesaun ba kandidatu trabalhadores ne’e ho justu no transparansia iha future.
Nia mos husu atu ema sira ne’ebe tuir kursu falta loron tolu tu-tuir malu, tenke hasai tiha tanba iha ema barak mak hakarak atu aprende lian Korea hodi ba servisu iha ne’eba.