Governu Cina Apoia Ekipamentus Agrikultura Ba Timor–Leste

Governu Republika Popular Cina entrega ekipamentus agrikultura nian hamutuk items 41 ba Ministerio Agrikultor e Peskas (MAP), fasilita servisu agrikultor sira iha munisipios hodi hasa’e produsaun iha rai laran.

Ministru Agrikultor e Peskas, Estanislau da Silva hateten ekipamentus sira ne’e nesesario tebes tanba governu presiza duni ekipamentu hirak ne’e atu ajuda agrikultor sira.
Nia dehan, ekipamentu sira ne’e mak hanesan traktores makina pesados hitu (7), makina kuda hare iha 18, makina koa no baku hare iha 7, Disco ba traktores 7 no escavator 2.
“Ekipamentu sira ne’e to’o iha altura ne’ebe ita iha difikuldade, ami sei fahe tuir kbi’it no situasaun ne’ebe ami haree presiza duni apoiu ne’e atu halo servisu,” nia hateten hafoin simu ekipamentus sira ne’e iha edifisio MAP Comoro, Dili.
Nia hateten, ekipamentus ne’e sei tau iha fatin sira ne’ebe natar luan hanesan Maliana, Webaba, Rai bere, Uato-lari no sei tau mos iha postu administrative Atabae atu fasilita agrikultor hortikultura sira fila rai, kuda modo no kuda strawberry.
Tanba ne’e, nia husu ba agrikultor sira ne’ebe hetan apoia ne’e atu utilize ho kuidadu liu –liu deposi uza ba kuda hare, tenke fase no troka oli regular nune’e bele dura.
Nia hateten, tuir meteorologia katak tinan ne’e udan been diak tanba ne’e aproveita ekipamentu sira ne’e atu implementa pratika agrikultura diak hodi hasa’e produsaun.
Entretantu, Xefe Departamentu da Mekanizasaun Severino Sousa Costa hateten traktorista no tekniku, mekaniku sira pronto atu halo operasaun ba iha ekipamentu sira ne’e, maibe presiza formasaun tanba makina sira ne’e foun.
“Hau nia operador sira preparadu atu utilize traktor hirak ne’e, maibe makina foun hanesan kuda hare, makina koa hare, baku hare ne’ebe ita hetan ne’e ami presiza iha treinamentu,” nia hateten.
Nia hateten, fulan Marsu iha peritu nain 7 mai husi Cina hodi fo formasaun ba iha operador Timor oan sira durante fulan ida.
Nia espera, ho formasaun ida ne’e bele hasa’e traktorista no mekanika sira nia kapasidade no abilidade hodi ajuda agrikultor sira halo operasaun ba iha makina hirak ne’e.
Nia informa, total traktorista no mekanika hamutuk nain 300 resin mak halo hela servisu iha munisipio sira. Kada munisipio ida mekanika ida no taktorista rua, maibe ba munisipio ne’ebe natar luan iha mekanika rua no traktorista rua.