Segunda, Fevereiro 19, 2018
Total visitors: 196285

Xefe Seguransa Ospital Nasional Guido Valdares (HNGV), Cosme Saldanha hateten ospital sei la responsabiliza motor ka sasan hirak ne’ebe lakon iha area (parkiran) ospital nian, tanba laiha baze legal ne’ebe dehan estado tenke selu fali sasan komunidade nian ne’ebe lakon.

Parte HNGV sei la responsabiliza ba sasan inklui motorizadas ne’ebe lakon iha parkiran ospital nian.

Pesoal seguransa ne’ebe monta iha ospital nian ne’e, nia hateten ne’e atu fo seguransa ba iha sasan estado nian iha ospital laran no fo protesaun ba iha pasientes no professional saude ne’ebe hala’o servisu iha laran.
“Ospital fasilita fo para fatin ho gratuita, maibe la fo seguransan ba iha motor sira, ida ne’e responsabilidade ema ida –idak nian,” nia hateten iha servisu fatin Bidau, Dili.
Tanba ne’e, nia sujere ba iha vizitante sira atu vizita familia ruma ne’ebe moras, labele haluhan atu xave motor no respeita sinais tranzitu ne’ebe tau ona iha ospital, atu fasilita movimentu emergensia sira (ambulansia).
Nia informa, total pesoal seguransa iha HNGV hamutuk nain 73, kada ekipa iha ema nain 15 hodi halo kontrolu ba iha movimentu ema nian iha ospital laran.
Numeru ida ne’e sufsiente atu fo seguransa ba iha ospital, maibe nia dehan kondisaun balun ne’ebe presiza haree, liu –liu baze legal ruma atu halo kobransa ba iha fatin para motor no kareta sira ne’e.
Iha tinan 2017, nia dehan iha motor 4 mak lakon iha ospital nasional inklui helem barak mak lakon mos. No iha tinan 2018 fulan kotuk (Janeiru), foinsa’e ida na’ok ema nia motor no koko atu lori halai sai, maibe lakonsege no kaptura e prosesa ona tuir lei.
Entretantu, Xefe Gabinete Kontrolu Kualidade e Komunikasaun Sosial, Paulina Pinto hateten vizitante ne’ebe tama iha ospital kada loron numeru bo’ot tebes, entaun susar ba pesoal seguransa sira atu kontrola.
Nia hateten, ospital hanesan fatin publiku no ema balun aproveita oportunidade hodi halo hahalok aat sira ne’e.
Portantu kona ba joven ida ne’ebe koko na’ok motor iha area Ospital nian foin lalais ne’e, nia dehan nia laiha ligasaun (laiha familia ruma baixa), maibe nia mai ho intensaun atu na’ok motor sira ne’ebe iha.
“Ami halo ona sosializasaun, katak labele lori sasan ne’ebe folin karun mai iha ospital no kuidadu sasan sira, tanba kuandu lakon ospital laiha responsabilidade,” nia hateten
Nia hateten, HNGV iha planu atu implementa kartaun vizitante no kartaun familia atu bele kontrola movimentu no halo kobransa ba iha fatin para motor no kareta hodi asegura seguransa.
Alende ne’e, nia dehan planu ida seluk mak monta CCTV iha koridor ospital nian, maibe seidauk realiza tanba instalasaun ne’e presiza kustu ne’ebe bo’ot.

E-mail Subscription

Enter your email address:

    Poll

    Nothing found!

    Follow us on Twitter