MSS Prepara Fos 1350 Sakas Ba Vitimas Dezastre Naturais

Fos 25kg hamutuk 1350 sakas preparadu iha armagen Ministerio Solidaridade Sosial nian, atu apoiu ba iha vitima dezastre naturais sira iha munisipios ne’ebe afeitado.

Xefe Departementu Assistensia Humanitaria iha Ministerio Solidaridade Sosial (MSS), Deniz da Silva hateten sira distribui ona apoia emergensia sira (family kids) hanesan lona, bikan, sana, sabun no seluk tan ba iha vitima sira, maibe seidauk tanba transporte laiha.
Tuir dadus ne’ebe tama iha nasional, nia dehan iha ema 1880 mak afeitado husi situasaun dezastre ne’ebe akontese iha fulan kotuk no sira hetan ona apoiu emergensia.
“Fos mak ita seidauk halo distribuisaun, tanba ita sei haree ita nia transporte ne’ebe kondisaun ladiak, diak maka foin ita bele halo distribuisaun,” nia hateten iha Salaun Formasaun Joao Paulo Comoro, Dili.
Nia dehan, total kareta ne’ebe ministerio iha hamutuk 4 maibe ho kondisaun aat hotu, entaun presiza apoiu husi ministerio seluk no parseirus atu transporta aihan sira ne’e ba iha munisipio.
Nia hateten, transporte sai hanesan obstaklu bo’ot ida ba sira nia servisu tanba ne’e responde ba situasaun emergensia sira sempre tarde.
Nia hatutan, governu iha akordu ho kompania Toyota atu hadia kareta governu nian, maibe tanba kareta aat barak entaun tenke hadia fazeadamente.
Nia informa, dezastre naturais ne’ebe akontese iha semana hirak ba kotuk ne’e sobu komunidade sira nia uma iha Munisipio Ainaro, Manufahi, Lautem, Viqueque, Bobonaro no seluk tan.
Tipu dezastre ne’ebe mosu mak hanesan rai monu, anin bo’ot sobu komunidade nia uma, ai tohar estraga ema nia uma no estraga plantasaun sira.
Iha parte seluk, Xefe Suku Afaloicai, Postu Administrativu Uato-Carbau, Munisipio Viqueque, Agustinho Pinto hateten komunidade presiza apoiu alimentasaun husi governu tanba dezastre anin bo’ot ne’ebe akontese iha semana hira liu ba estraga hotu plantasaun.
Nia dehan, komunidade hamutuk 103 mak nia plantasaun (batar, hudi no seluk tan) hetan estragus total no sira sei infrenta problema insufsiente aihan.
“Hahan sira iha sira nia kintal ne’e estraga total, tanba ne’e tinan ida ne’e batar sira sei la koileta,” nia hateten
Nia dehan, to’o agora official Ministerio Solidaridade Sosial munisipio Viqueuqe nian seidauk to’o iha fatin akontesementu hodi haree situasaun komunidade ne’ebe hetan afeitado husi dezastre.