Hari Monumentu Ba Vitima 12 Novembru Hela Ba Promesas

Planu atu hari monumentu ida ba vitima 12 Novembru 1991 hela deit promesas, tanba mandatu  governu ida ne’e falta deit semana ida atu remata.
Tuir Vise Prezidente Komite 12 de Novembru, Rogerio Castro da Cruz katak, parte komite hein deit desizaun husi governu atu realiza planu ida ne’e.
“Preparasaun tuir lolos hahu iha 2011 maibe rezultadu laiha to’o agora, foin mak tau plaka,” dehan Vise Prezidente Komite 12 Novembru, da Cruz iha Balide, Dili.

Vise Prezidente Komite 12 Novembru ne’e afirma, governu liu husi Ministeriu Infraestrutura (MI) mak iha kompetensia atu hare oinsa para prosesu ne’e la’o, tanba dezenu iha tiha ona.

Entertantu Membru Komisaun G Parlamentar, Deputadu Joaquin Amaral dehan, Parlamentu aprova tiha ona orsamentu husi 2011 nian ba projeitu ne’e, maibe to’o agora laiha rezultadu.

“Tanba saida mak monumentu ida ne’e seidauk halo, to’o agora Parlamentu Nasional seidauk simu informasaun husi komite 12 Novembro, maibe ida ne’e hanesan atu tutan fali joventude loriku as’wain nia luta, pelumenus iha netik simbolu monument deviaser tenke halo,” afirma Deputadu ne’e.