Rehabilitasaun Edifisiu Foun MS Atinji Ona 95 pursentu

Prosesu rehabilitasaun ba Edifisiu Ministeriu Saúde (MS) foun no eis Edifisiu Palasio das Cinzas ne’ebe hala’o husi Kompania Aitula Constraction .Ltd agora dadaun atinji ona 95 pursentu no sei entrega ba Governu iha fin de fulan ne’e.

“Ami hein transferensia osan husi governu tanba hahu fulan Marsu to’o agora sira seidauk fo osan ne’e sai impaktu bo’ot ba prosesu rehabilitasaun,” dehan Manajer Projeitu Kompania Aitula Ltd., Perfecto Jimenez, (25/07), iha Kaikoli, Dili.
Enkuantu tuir Diretor Nasional Administrasaun Logistica e Aprovizionamentu Ministeriu Saúde, Leão Borges katak edifisio foun entrega iha fulan ida ne’e antes governu foun simu tomada de pose, nune’e bainhira sira tama bele uza ona edifisiu ne’e.

“Agora hein deit kompania sira hadia oituan iha oin sira ne’e no limpeza laran hotu no to’o tempu ne’ebe determina ona sira entrega ba governu nune’e ministerio saúde bele uza ona,” dehan Diretor Borges.

Kona ba Diresaun ne’ebe mak sei uza edifisiu foun, Diretor ne’e dehan sira seidauk identifika no deside maibe klaru governu foun mai bele uza ona.

Ministeriu Saúde iha Diresaun Nasional lima mak sei iha ket-ketak durante ne’e, balun iha Lahane, Kaikoli, Comoro nune’e mos Gabinete Ministru, Vice Ministru no Diretor Jeral.

Projeitu rehabilitasaun ba edifisiu foun ne’ebe gasto orsamentu hamutuk US$1.764.363,72 tuir lolos entrega iha dia 20 fulan Setembru 2011 maibe tanba iha failansu husi parte governu rasik no kompania mos hodi adia projeitu ne’e to’o ohin loron atinji ona 95 pursentu hein katak iha fulan ida ne’e bele prontu.