Salariu Baziku $115 Aplika Ba Empregada Unskill

Salariu Minimu iha Lei Kodigu Laboral foun ne’ebe fo sai husi governu liu husi Sekretariu Estadu Formasaun Professional e Empregu (SEFOPE) ho $115 kada fulan aplika deit ba empregada ne’ebe laiha skill (unskill).

“Ne’e ba sira ne’ebe servisu iha restorante, lozas inklui servisu domestika, maibe ba sira ne’ebe servisu iha NGO sira depende ba sira nia kapasidade,” hateten Inspetor  Jeral du Trabalhu, Aniceto Leto Soro, foin lalais iha Hotel Timor, Dili.

Tuir nia, salariu minimu ne’e  validu hahu iha 22 Junu 2012, e husi sira nia parte halo ona sosializasaun ba iha komunidade sira, liu-liu patraun sira nune’e sira bele selu sira nia staf tuir standar lei kodigu laboral foun ne’e.

Kona ba Patraun balun tantu Lozas ka Restorante inklui Domestic Worker ne’ebe kontinua simu salariu tuir lei kodigu laboral tempu UNTAET nian, Inspetor dehan nia parte seidauk simu reklamasaun ruma kona ba asuntu ne’e.

“To’o agora ami seidauk simu reklamasaun, trabalhadores sira mos la mai hato’o reklamasaun, kuandu iha violasaun ita sei foti medidas aplika multa ba sira depende ba gravidade salah minimu ema ida selu US$230,” dehan Inspetor Jeral do Trabalhu ne’e.

Inspesaun Jeral sei halo monitorizasaun ba implementasaun lei laboral foun ne’e iha lozas sira, restorante sira no iha kompania sira.

Nia afirma, implementasaun salariu minimu laiha problema tanba emprezario balun halo konsultasaun ho SEFOPE atu implementa, iha parte balun emprezario balun mos seidauk implementa tuir desizaun ne’ebe iha, tanba prosesu rejutamentu sei la’o hela  no kompania balun sei hadia kontratu  servisu ne’ebe iha.

Trabalhadores sira ne’ebe sei simu salariu US$ 85,00 sei halo reinbolsa fali ba restu salariu ne’ebe seidauk simu tanba sira simu ona desizaun governu nian.

Iha parte seluk Trabaladora Maria Fernandes, sente triste tanba governu deside ona salario minimu US$ 115 maibe sira kontinua simu US$ 100,00 mai kraik ho ida ne’e sira husu ba governu atu bele halo sosializasaun ba kompania hotu atu bele implementa desizaun ne’e ho diak.

“Ami husu ba governu liu-liu Sekretario Estadu Formasaun Porfesional e Emprego atu bele halo monitorizasaun ba implementasaun salario minimu tanba nudar trabalhadores sira lakohi lakon sira nia direitu,” husu Trabalhadora Fernandes.