Iha Mandatu III Lejislatura Sei Priotiza Lei Tolu

Iha mandatu III lejislatura membru Parlamentu Nasional sei aprova lei prioridade tolu hanesan Lei Veteranus, Lei Rai no Lei Anti Korupsaun ninian.

“Sira seluk tan ne’ebe ke mai husi segundu lejislatura ninian ne’ebe kaduka tiha ona ,ne’ebe ami sei foti fali aprezenta ba Meja Parlamentu tau prioridade diskusaun,” hateten Deputadu husi Bankada Congresu Nasional  Rekonstrusaun de Timor (CNRT), Pedro da Costa Martires, (30/07), iha PN.
Entertantu Eis Deputadu husi Bankada Klibur Oab Timor Asuwa’in (KOTA), Manuel Tilman sujere ba Deputadu foun iha III Lejislatura nian, atu estuda didiak programa Planu Estratejiku Dezenvolvementu Nasional () PEDN) antes implementa.

“Hau hanoin programa ne’ebe sei sai baze ba kintu governu ne’e mak programa PEDN, tanba ne’e husu ba deputadu sira atu estuda didiak programa ida ne’e,” Eis Deputadu Tilman husu.

Tilman mos husu atu hare fila fali lei hirak ne’ebe mak sei pendent hela iha parlamentu, atu diskute fila fali nune’e bele hetan aprovasaun, liu-liu lei pakoterai nian, “estuda didiak tanba lei ne’e nudar baze ba ita nia vida tomak, mos baze ba planu estratejiku rasik,”.

Ejizensia hanesan mai mos husi Eis Deputadu Domingos Mesquita, atu prirotiza uluk lei tolu ne’ebe konsidera importante tebes ba nasaun no povu ida ne’e.

“Lei rai nian, lei anti korupsaun depois lei reparasaun das vitimas lei tolu ne’e pelomenus Terseiru lejislatura ninian aprova iha tinan ida ne’e nia laran,” Eis Deputadu ne’e sujere.*