Ba Futuru Trata Sertidaun RDTL Sei Selu

Ba futuru Oficiais Diresaun Nasional Registo Sivil no Notariado (DNRCN) sei halo pagamentu ba povu Timor-Leste ne’ebe halo tratamentu ba dokumentus hanesan Sertidaun RDTL, Bilete Identidade no seluk tan tanba lei iha ona.
“Ita iha ona lei ne’ebe mak fo lisensa ba oficiais no konservadores atu halo kobransa ba maluk sira ne’ebe trata dokumentus sira ne’e, tuir lei lolos hahu halo kobransa iha dia 01 fulan Janeiru tinan ida ne’e maibe ami hare katak ona seidauk iha manuais prosedimentu pagamentu ninia ne’ebe lolos tanba ne’e ami seidauk halo kobransa ba populasaun sira, so pasaporte deit,” dehan Diretor Rejistu Sivil Distritu Dili, Vitor da Costa Neto, (07/08) iha Kaikoli, Dili.

Kona ba folin ho montante hira, Diretor neto dehan seidauk klaru tanba sira seidauk halo diskusaun maibe sei depende ba gastus hodi produs dokumentus hirak ne’e.

Tuir dadus ne’ebe iha hahu husi fulan Janeiru to’o fulan Junu tinan ida ne’e, DNRCN fo ona atendimentu ba populasaun sira ne’ebe trata sira nia dokumentus hamutuk Oitu mil novisentus e seisentai cinco (8.965) no kada fulan fo sai 800 sertidoens.

Enkuantu Deputada Josefa Alvares Soares konkorda ho desizaun ne’ebe governu iha, nune’e povu mos bele kontribui ba dezenvolvimentu nasaun nian. “La’os depende deit ba governu.”

“Konserteza tenke iha pagamentu iha nasaun hotu-hotu kuandu trata dokumentus hanesan ne’e ita tenke selu osan oituan hodi kontribui hanesan tasa reseita estadu hodi halo dezenvolvimentu ba ita nia nasaun,” Deputada Soares aseita.