Meja PN Tenke Fo Importansia Lei Reparasaun Ba Vitima

Bankada Opozisaun Fretilin sujere ba meza Parlamentu Nasional atu tau importansia ba Lei Reparasaun ba vitima 1975 to’o 1999 no Institutu da Memoria ne’ebe sei pendenti hela iha Parlamentu.
“Lei reparasaun das vitimas no mos institute da memoria ne’e importante hotu, e Meja tenke tau prioridade,” sujere Deputadu Bankada Fretilin, Francisco Branco (08/08) iha PN.

Alende Lei Reparasaun das Vitimas no Institutu da Memoria, konsidera mos Lei Anti Korupsaun no Lei Pensaun Vitalisia ne’ebe sei pendent hela iha Parlamentu.
Iha fatin hanesan Deputadu husi Bankada Congresu Nasional Rekonstrusaun de Timor (CNRT), Mateus de Jesus katak, atu diskuti fila fali lei hirak ne’e, bankada hat tenke tau ideas hamutuk, atu oinsa mak bele avansa lei sira ne’e.

Hatan ba kestaun ne’e, Vise Prezidenti Parlamentu Aderito Hugo katak, Lei Reparasaun la konsege aprova iha II lejislatura tanba produs lei barak liu, maibe gasta mos tempu barak hodi aprova lei rua ne’ebe importante tebe-tebes hanesan lei kodigu sivil no lei kodigu penal .

“Hau sente partidu hotu-hotu iha komitmentu liu-liu partidu hat ne’e hare ba kestaun alterasaun lei ba veteranu no antigu kombatente ninian atu responde ba lamentasaun ne’ebe iha publiku,” Vise PN ne’e katak.