- Publika iha: 21 Janeiro 2019
Servisu Saude Munisipio Dili hahu halo pulverizasaun (rega) massal iha area riskus hanesan ultimo intervensaun ba prevensaun transmisaun moras dengue iha sosiedade.
Diretora Servisu Saude Munisipio Dili, Agustinha Segurado hateten kapital Dili sai hanesan fatin ne’ebe endemiku ba moras dengue tanba dadus statistika kada tinan hatudu komunidade Dili numeru a’as afeitado ba dengue.
Tanba ne’e, antes udan monu rai iha fulan Agustos 2018, ekipa taks force halao ona asaun prevensaun sira hanesan fo edukasaun sensibilizasaun ba komunidades atu mantein ambiente moos no halo distribuisaun aimoruk abate ba komunidades atu oho susuk nia tolun.
“Moras dengue laiha tratamentu espesifiku, pa-siente mai ho isin manas ita fo aimoruk hatun isin manas mai ho hemorogia ita halo transfusaun ran tanba ne’e prevensaun maka importante,” nia hateten iha servisu fatin Formosa, Dili.
Nia dehan, sira identifika ona fatin risku ba dengue hamutuk 145 iha kapital Dili tanba ne’e agora dadaun ekipa halo hela pulverizasaun ba fatin sira ne’e atu hapara transmisaun moras ne’e ba komunidades.
Nia informa, dadus tinan kotuk 2018, munisipio Dili registu kazu dengue hamutuk 226 nain ida mate no agora dadaun iha primeiru semana tinan 2019 registu ona kazu ida.
Iha parte seluk, Diretor Ezekutivu Ospital Nasional Guido Valadares (HNGV), Aniceto Barreto hateten ospital preparadu intermus rekursu humanu, fasilidade no medimantus atu responde ba iha moras sira ne’ebe akontese iha tempu udan hanesan dengue.
Nia dehan, kada tinan HNGV prepara aimoruk, reajente no fasilidade adisional seluk atu responde ba situasaun sira ne’e to’o iha fulan Marsu tinan oin tanba iha fulan sira ne’e numeru moras aumenta makas.
“Ita iha asumsaun ida kada tinan ita prepara 15% adisional aimoruk, reajente hodi responde situasaun ida ne’e to’o fulan Marsu, maibe bainhira akontese surtu ruma ita sei kordena fali ho ministerio saude hodi asegura,” nia hateten.