- Publika iha: 09 Outubro 2023
Voluntariu Australiano Nick Oats hateten sira konsegue halibur fundu husi atividade angarasaun fundus no doasaun husi organizasaun sira ne’ebé promove desportu skateboard iha Australia, hodi re-konstrui fali skate park iha Comoro Dili, atu fo opsaun ba labarik no joven sira ne’ebé la gosta joga bola bele aprende desportu seluk hanesan skateboard.
Nia dehan dezenho skate park ne’e seguru ho padraun kualidade ne’ebé aas no ema hotu tantu labarik, joven no adultu sira mos bele utiliza espasu ne’e hodi aprende no dezenvolve abilidade konaba desportu skateboard.
“Ida ne’e desportu ne’ebé konstrutivu no kreativu tanba ita bele halo mesak no ho kolega sira, entau ida ne’e diak ba atividade individual no dezenvolvimentu komunitaria.
Hau hatene agora dadaun desportu bola popular tebes iha Timor-Leste, maibe ida ne’e fo opasaun ba sira seluk ne’ebé la gosta joga bola sira bele hili opsaun ida ne’e aprende skateboard,” nia hateten iha Rai Kotu Comoro, Dili.
Nia hateten nudar ema ne’ebé gosta desportu skateboard hakarak promove mos desportu ida ne’e iha Timor-Leste.
“Sim ami kontente hare dezenvolvimentu desportu skateboar iha Timor-Leste. Iha ami nia rai Australia, iha skatepark rihun no kada governu lokal iha skatepark, entau desportu ne’e popular tebes ba joven sira no ema idade hanesan hau gosta halimar skateboard,” nia hatutan.
Nia haktuir projetu voluntariu re-konstrusaun skate park ne’e sei gasta orsamentu ho montante purvolta $75,000. No orsamentu sira ne’e hetan doasaun husi The Skateroom, Wonders Around the world, Decks for Change no kompaña RMS ajuda hodi halo konstrusaun.
Nia informa sira sei buka doasaun ekipamentu skateboard apoia labarik no joventude sira bele aprende ho gratuita.
Entretantu, Joven Joaojinho Leri Seran hateten sente kontente no agradese tebes ba belun Australiano sira ne’ebé voluntariumente buka osan hodi halo konstrusaun ba fatin skateboard ne’e tanba durante ne’e labarik no joven sira barak mak iha interese aprende skateboard, maibe laiha espasu ne’ebé seguru atu aprende.
“Sente kontente tanba sira mai ho laran no fuan hakarak hadia duni fatin ne’e atu promove desportu skateboard ba oin tanba iha ne’e durante ne’e joga bola mak barak liu,” nia hateten.
Nia dehan iha tinan 2009, nia aprende desportu skateboard ne’e iha duni skate park ne’ebé Organizasaun ba Futuru harii iha tinan 2006, depois akontese krize.
Iha parte seluk, Jestor Programa Peace building, iha Organizasaun Ba Futuru, Vidal Campos hateten skate park ne’e hari iha tinan 2006, ho objetivu ida atu halibur labarik no joven sira halimar no aprende baut foun hanesan meus ida atu sira rekupera husi sentimentu trauma tanba situasaun krize.
Nia dehan durante ne’e sira halo esforsu hato’o proposta ba governu atu bele halo rehabilitasaun ba skate park ne’e, maibe laiha konsiderasaun tanba ne’e agradese ba belun sira husi Australia, ne’ebé konsege halibur fundus hodi re-konstrui fatin ne’e.
“Espera katak ho fatin ne’ebé diak ema bele mai aprende no ita bele halo buat ruma liga ho skateboard ne’e, liu-liu loke kompetisaun ba labarik no joven sira atu enkoraja sira aprende desportu ida ne’e,” nia hateten.
Nia hateten iha Timor, skate park ida deit mak iha aredores NGO Ba Futuru nian. Ne’ebé agora dadaun iha hela prosesu re-konstrusaun.