KNCTI sei toma atensaun ba labarik involve servisu todan

Diretora Nasional Relasaun do Trabalho iha Sekretariu Estadu Formasaun Profesional e Empregu (SEFOPE), Auxiliadora Gusmão Guterres hateten sira sei estabelese Komisaun Nasional Contra Trabalhador Infantil (KNCTI), ho objetivu atu fo protesaun ba labarik sira ne’ebe involve iha servisu todan, ne’ebe sei fo perigozu ba sira nia vida.

“Ami nia espetativa ne’e bo’ot, maske mandatu hotu ona maibe ami sei incaminha nafatin governu atu tau draft ne’e iha konsiderasaun karik governu ne’e la aprova,  tanba labarik mos importante ba dezenvolvimentu nasaun nian tanba sira mak abut ba nasaun ida ne’e,” dehan Diretora Gusmão, semana kotuk  (26/03) iha knar fatin Kaikoli Dili.

Diretora ne’e hatutan, draft ne’e tama ona final no aprezenta ona baiha Gabinete Primeiru Ministru e agora hein deit rezultado husi Konselho Ministru (KM).

Tuir Diretora Guterres, maske seidauk hetan rezultadu husi KM, membru husi komisaun ne’e hala’o ona enkontru hodi aprezenta programa atu rekoilha informasaun no elabora servisu ne’ebe kategoria  perigozu ba labarik sira hanesan involvimentu labarik iha servisu agrikultura ne’ebe servisu ho pestisida, no construsaun.

Iha parte seluk Teknico Superior Komisaun Nasional Direitu Labarik (KNDL), Madalena Guterres Coreia hateten draft KNCTI ne’e importante tebes, tanba agora dadauk labarik barak mak involve iha servisu kategoria todan hanesan buka osan hodi fan sasan iha luron ibun no balun mos involve iha vida prostituisaun.

“Hau hanoin mandatu governu sei laiha pengaruh ho planu Sekretario Estado Formasaun Profesional e Emprego nian atu  estabelese  Komisaun Nasional Contra Trabalho Infantil iha rai laran tanba inisiativa ne’e tama ona iha planu estrategia SEFOPE nian,” dehan Coreia.

Komisaun ne’e sei estabelese ho involvement husi Ministerio relevante sira  hanesan Ministerio Saúde, Ministerio Edukasaun, Ministerio Finansas,  Ministerio Solidaridade Sosial, Ministerio Justisa, Ministerio Agrikultura, Sekretario Estado Promosaun Igualidade, CCI-TL, Konfederasaun Sindikatu Timor-Leste, Sosiedade Sivil, UNICEF no Organizasaun Intrenasional ba Trabalhador (ILO) ne’ebe durante ne’e servisu ba asuntu labarik.