SEPFOPE Kapasita Joventude Ba Implementasaun ZEESM

Sekretariu Estado Politika Formasaun Profesional e Empregu (SEPFOPE) oras ne’e dadaun kapasita ona joventude nain 150 iha distritu Oe-Cusse, hodi prepara sira ba implementasaun projetu pilotu Zona Espesial ekonomia Sosial Merkadu (ZEEMS).

Sekretariu Estado, Ilidio Ximenes da Costa, hateten Timor oan labele sai haree nain (penonton) ba implementasaun projetu ZEEMS, tanba ne'e mak SEPFOPE fo formasaun ba joventude hirak ne'e iha area konstrusaun.

“Ba ZEEMS, ita prepara ona jovens nain 150, kompania ne’ebe mak manan projetu ne’e, ita sei halo aprosimasaun ho sira," SE da Costa hateten, iha Parlamentu Nasional.

Nia rekonese, katak projetu bo’ot barak mak sei domina husi trabalhador estrangeirus, tanba ne'e SEPFOPE kontinua kapasita Timor oan sira iha areas hanesan operador no teknika ba ekipamentus pezadu, konstrusaun nian hodi kompete ho sira.

Entretantu Deputada Florentina Smith, preokupa tebes ho kualidade trabalhador Timor sira nian no presiza hasa’e tan, tanba kompetisaun iha merkadu, sei rigorozu liu tan bainhira Timor –Leste tama iha ASEAN. 

“Hau hanoin tenke reforsa ita bo’ot sira nia politika hasa’e kualidade trabalhador sira nian, tanba ita sei adere ba ASEAN,” Deputada Smith hateten. 

Iha parte seluk, Diretora Instituto Nasional Dezenvolvimentu Mão de Obra (INDMO), Isabel Fernandes de Lima, rekonese katak kualifikasaun ne’ebe dadaun ne'e  Timor –Leste iha ne’e nivel baziku to’o kuadru "ba nesesidade nasional seidauk internasional,". 

Nia hatutan, kualifikasaun ne’e haree kona ba konesementu, abilidade no atitude tanba ne’e pesiza hatene nesesidade setor privadu sira nian antes halo kualifikasaun ba area espesifiku sira hanesan operador ekipamentus pezadu, outomotif no konstrusaun. 

“Tinan 2015 odamatan ASEAN nakloke ba harmonizasaun kualifikasaun, entaun ita mos aprezenta ita nia nivel kualifikasaun hodi kompete iha merkadu,” nia dehan.