- Publika iha: 22 Outubro 2014
Organizasaun internasional Childfund durante 20 anos prezensa iha Timor-Leste konsege ona fo apoia konstrusaun no rehabilitasaun pre-eskolar hamutuk 45, ne’ebe kobre iha distritu lima iha rai laran.
Diretor Nasional Childfund iha Timor –Leste, Geoffrey Ezepuc, hateten eskola infantil ne’e importante tebes hodi eduka no prepara labarik sira iha futuru, intermus mental, lingua no aktividade positive balun ne’ebe kontribui ba iha dezenvolvimentu labarik nian,”.
Alende apoia material ba iha rehabilitasaun no livrus, meja no karteiras, nia dehan, loke mos sentru labarik iha komunidade nia le’et hamutuk 30.
“Ami apoiu materia hanorin, alimentasaun, treinamentu ba profesores sira inklui mos materia rehabilitasaun no kontrusaun ba eskola balun,” Diretor Ezepuc hateten, iha salaun Formasaun João Paulo II, Comoro, Dili.
Distritu sira ne’ebe sai benefisiario ba iha programa Childfund, nia dehan, mak distritu Manatuto, Liquisa, Lospalos, Bobonaro no Covalima, liu –liu area izoladu sira ne’ebe do’ok husi capital distrital.
Nia hatutan, labarik hirak ne’ebe asesu ba iha sentru labarik no pre-eskolar maioria kreativu, sira bele halo rasik istoria, kanta,lee no halo buat seluk tan.
“Ami nafatin iha komunidade sira nia kotuk hodi apoia dezenvolve partisipasaun labarik sira nian,” nia hatutan.
Kada tinan labarik hamutuk 3.500 mak sai benefisiario ba iha edukasaun formal ne’ebe apoia husi Childfund nia programa.
Iha parte seluk, Komisaria Komisaun Nasional Direitu Labarik, Maria Barreto, hateten edukasaun infantil importante tebes ba labarik sira hodi dezenvolve sira nia mentalidade.
Tanba ne’e nia sujere, presiza fo prioridade ba sentru labarik sira (krese) inklui mos eskola infantil sira ne’ebe iha.
“Ita hotu hahu husi familia, komunidade, governu no estado tau prioridade ba labarik sira nia dezenvolvementu, hanesan ita hakru’uk ba sira nia direitu fundamental ne’ebe konsagra ona iha konstituisaun RDTL,” nia hateten.
Komisaria mos, husu nafatin apoiu husi organizasaun internasional sira hanesan UNICEF, Childfund, Plan internasional atu promove no dezenvolve partisipasaun labarik Timor oan sira diak liu tan.