- Publika iha: 17 Novembro 2014
Jovens Timor oan nain hat hetan oportunidade hala’o estagio profesional kona ba konstrusaun nian iha kompania bo’ot sira iha Nova Zelandia.
Embaixador Nova Zelandia iha Timor –Leste, Jonathan Schwass, hateten programa estagio ne’e espesifiku ba iha konstrusaun estrada, tanba area sira ne’e mak sai atividade bo’ot iha Timor –Leste, agora no ba futuru.
“Sira ne’e la’os ema foun, maibe ema ne’ebe servisu ona iha kompania nasional sira ne’ebe ejiste, ho objetviu hasa’e sira nia kapasidade espesifiku ba iha konstrusaun estrada,” Embaixador Schwass hateten, iha nia fatin Motael, Dili.
Nia hatutan, durante fulan tolu ne’e sira sei aprende buat barak, liu –liu operasaun kompania nian ba konstrusaun estada no edifisio sira, tanba kompania ne’ebe sira halo estagio ba ne’e kompania bo’ot no konesidu iha mundu.
“Ami espera sira hetan no aprende buat ne’ebe kompania rua ne’e hatudu ba sira iha ekipa, bainhira sira fila fali mai sira bele dezenvolve sira nia kareera no servisu rasik,” Embaixador Schwass esperansa.
Nia dehan, programa estagio ida ne’e hanesan pilotu, maibe kuandu iha rezultadu diak, ba futuru sei kontinua no haluan tan ba area sira seluk mos.
Durante prosesu, nia esplika, iha kandidatu husi kompania nasional sira ne’ebe eziste hamutuk nain 30 mak hatama aplikasaun, no ikus mai nain hat ne’e mak pasa no hetan oportunidade hala’o estagio iha Nova Zelandia.
Timor oan nain hat ne’e, nia dehan, kompostu husi feto nain rua no mane nain rua, mane nain rua ne’e sei halo estagio iha Kompania Downer Ltd iha Palmerston North, enkuantu feto nain rua iha Hawkins Ltd iha Auckland.
Iha parte seluk, Diretor Jeral Sekretario Estado Politika Formasaun Profesional e Empregu (SEPFOPE), Jacinto Gusmão Barros, fo agradese ba governu Nova Zelandia, tanba fo ona oportunidade ba joven sira atu halo estagio iha kompania bo’ot sira iha Nova Zelandia.
“Bainhira sira fila mai apoia fila fali Kompania ne’ebe sira servisu ba sai forte liu tan, ne’e mak komitmentu governu nian atu apoiu setor privadu sira,” Diretor Jeral Gusmao hateten.
Nia hatutan, programa ida ne’e parte ida husi formasaun nian, tanba ne’e SEFOPE nafatin koopera ho instituisaun relevante seluk hodi fortifika kapasidade tekniku sira nian iha area konstrusaun.