- Publika iha: 17 Janeiro 2015
Membru Parlamentu Nasional konsidera ezekusaun Orsamentu Jeral do Estado (OJE) ne’ebe kada tinan aprova iha Parlamentu Nasional seidauk sensivel ba jeneru, tanba realidade orsamentu la fo benefisiu ba feto no labarik.
Prezidente Komisaun F ( saude, edukasaun, klutura, veteranus no igualdade jeneru), Deputadu Virgilio da Costa Hornai, hateten iha area rural feto no labarik sei moris vulneravel tebes no la hetan atensaun ne’ebe masimu husi governu nudar ezekutador.
“Iha kapital ladun sente, maibe iha area rural feto sira presiza atensaun politika husi ita liu –liu programa ne’ebe bele muda ambiente sira ne’ebe bele fo benefisiu ba sira,” Deputadu Hornai kestiona, iha Hotel Timor Dili.
Nia hateten, ezekusaun orsamentu sensivel ba jeneru ne’e 0,1% deit kada tinan, tanba ne’eorsamentu iha 2015 nian komisaun sei analiza didiak politika ministeriu nian hodi fo sensivel ba jeneru.
Tanba tuir nia, feto iha area rural presiza tebes atensaun husi ukun nain sira, tanba sira seidauk sente benefisio orsamentu jeral do estado ne’ebe kada tinan parlamentu aprova.
Iha parte seluk, Prezidente Grupo Feto Parlamentar,Deputada Josefa Alvares Pereira Soares, hateten dezenvolvementu iha rai laran la justu ba povu, tanba populasaun iha capital deit mak sente.
“Ih area remotas laiha bee moos, fasilidade saude do’ok husi sira nia hela fatin, kondisaun eskola at no estrada at,” Deputada Soares kestiona.
Tanba ne’e, nia husu ba governu atu orsamentu tinan 2015 nian, tenke fo ona atensaun ba populasaun sira iha area remotas, tanba sira mos iha direitu atu hetan atensaun husi governu.
Hatan ba kestaun ne’e, Sekretaria Estado ba Promosaun Igualdade (SEPI), Idelta Maria Rodrigues, rekonese kestaun ne’e no bolu atensaun ba ministeriu hotu atu iha politika orsamental ne’ebe apropriadu sensivel ba jeneru.
“Ita feto sira presiza koalia nafatin atu bolu atensaun ba hotu-hotu atu fo atensaun ba feto sira, tanba feto sai fator importante ba dezenvolvementu pais nian,” SE Rodrigues hateten.
Kada tinan, nia dehan, SEPI tinan –tinan fo apresiasaun jeneru ba linha ministerio sira ne’ebe iha politika orsamental no programa ne’ebe aproriadu ba promove igualidade jeneru hanesan meus ida atu fo korajen ba linha ministerio sira atu promove nafatin partisipasaun feto.