AFM Sosializa Diretu Labarik Ba Komunidades

Prezidente Asosiasaun Feto Munisipio Manatuto (AFM), Clara de Carvalho Ximenes, hateten sira servisu hamutuk ho official protesaun labarik iha baze hala’o kampanha sosializasaun kona ba direitu labarik nian ba komunidades.

Nia dehan, numeru violasaun ba direitu labarik iha area rural kontinua aas no labarik sira la hetan protesaun ne’ebe adekuandu husi instituisaun governu no sosiedade, tanba falta konesementu no koordenasaun. 

“Ami servisu hamutuk ho governu lokal Ministerio Solidaridade Sosial no polisia komunitaria habelar informasaun ba komunidades kona ba protesaun ba labarik,” Ximenes hateten bainhira partisipa iha kongresu nasional feto iha Delta Nova, Dili. 

Nia preokupa kazu violensia hasoru labarik menoridade barak akontese iha area rural no resolve liu husi justisa formal (fo sala malu). 

“Tenke iha legislasaun ruma hodi garantia kazu sira ne’ebe labele resolve iha justisa informal, tanba fo vantagen ba ema ne’ebe iha kbi’it atu kontinua halo violensia hasoru ema vulneravel sira,” nia hateten. 

Iha parte seluk, Sekretario Estado Promosaun Sosio Ekonomia da Mulhers (SEM), Veneranda Lemos Martins, husu ba administrador munisipios atu servisu hamutuk ho asosiasaun feto ne’ebe estabelese ona hodi promove diak liu tan partisipasaun feto iha area rural no fo protesaun ne’ebe diak ba labarik sira. 

“Husu mos ba administrador no sekretario munisipio sira atu servisu hamutuk ho asosiasaun feto iha munisipio hodi promove igualidade jeneru, problema violensia domestika no forma violensia oi-oin ne’ebe hasoru feto no labarik sira,” SE Lemos hateten. 

Nia hatutan, SEM pronto atu buka dalan liu –liu merkadu hodi promove produtus grupo feto sira nian, tanba ne’e asosiasaun feto sira tenke identifika ona grupos produtor atu bele kapasita aan no dezenvolve produsaun ne’ebe iha.