- Publika iha: 09 Fevereiro 2016
Prezidente Komisaun Nasional Kontra Trabalho Infantil (KNTI), Aniceto Leto Soro, hateten sira hahu hala’o ona peskiza national ida kona ba numeru trabalho infantil iha Timor –Leste.
Nia dehan, komisaun ne’e estabelese iha tinan 2014, maibe seidauk hala’o nia servisu ho diak, tanba presiza estatistika ida hodi estabelese planu asaun national kontra trabalho infantile iha rai laran.
“Ita servisu hamutuk ho International Labour Organization (ILO) no Diresaun National Estatistika Ministerio Finansas halo hela peskiza ida kona ba trabalhador infantil iha rai laran,” Prezidente KNTI Soro hateten, iha Kaikoli, Dili.
Nia hatutan, peskiza ida ne’e sei hala’o iha teritorio tomak, tanba labarik involve iha servisu la’os deit iha sidade, maibe iha area rural mos.
Nia promete, resultado peskiza ida ne’e sei publika iha fulan rua tuir mai, tanba planu peskiza ne’e sei halo fulan ida deit.
Nia hatutan, servisu ne’ebe komisaun hala’o durante ne’e mak halo kampanha sosializasaun ba komunidade iha munisipio Baucau, Aileu no Ermera kona ba direitu labarik no servisus perigu ne’ebe labele involve labarik.
Entretantu Diretora Forum Komunikasaun Joventude (FKJ), Madalena da R. Pinto Baptista, hateten labarik ne’ebe sira hala’o servisu iha dalan ninin, tanba kondisaun mak obriga.
Atu hakotu problema trabalho infantil iha Timor –Leste, nia hateten, primeiru tenke hakotu uluk problemas sosial sira, tanba numeru labarik iha estrada tanba mukit.
“Ami koalia ho inan aman sira e buat ne’ebe sira dehan mak oan tenke halo servisu ne’e hodi ajuda sira sosa nesesidades, tanba sira laiha servisu,” nia hateten.
Nia informa, tuir dadus outreach ne’ebe FKJ iha, iha tinan 2015 konsege identifika labarik hamutuk nain 223 resin mak fa’an iha estrada ibun iha sidade laran.