Sexta, Março 29, 2024
Total visitors: 766366

Bazea ba peskiza husi agensia Programa Alimentar Mundial (PAM) ho Fundasaun Alola iha tinan 2015, hatudu katak labarik ho idade fulan neen mai kraik, iha nain 1,904 mak sofre malnutrisaun isin krekas.

 

Peskiza ne’e rasik hala’o iha munisipio Dili, Covalima no regiaun especial Oe-Cusse ho metodu sai tama uma kain hodi sukat bebe no inan isin rua inklui inan fo susu sira nia liman kabun (pesu). 

Diretor PAM iha Timor-Leste, Stephen Kearney hateten objetivu husi peskiza ne’e mak atu hatene status nutrisaun iha uma kain sira iha munisipio hirak ne’e. 

“Liu husi sukat ida ne’e, importante atu detekta sé mak sofre mal nutrisaun no sira hela iha ne’ebe, atu ita bele suporta Ministerio Saúde  fornese tratatementu” nia hateten liu husi komunikadu imprensa ne’ebe TDW asesu ba.

Alende sukat labarik sira nia liman kabun, halo mos ba inan isin rua no inan fo susu sira, tuir dadus ne’ebe iha hatudu katak inan hamutuk nain 2,431 mak sofre mal nutrisaun isin krekas. 

Nia hateten, isin krekas mak forma ida husi mal nutrisaun ne’ebe ema ida nia todan ki’ik liu ba sira nia altura. 

Tuir nia, kazu mal nutrisaun importante tebes atu identifika sedu liu –liu inan isin rua no fo susu sira, nune’e halo rekoperasaun sedu hodi labele implika ba bebe ne’ebe iha isin no sira ne’ebe susu hela. 

Nia informa, loron 1,000 mak sai hanesan loron primeiru iha ema ida nia moris no loron kritiku ba labarik ida nia dezenvolvimentu fiziku no mentalidade. 

Atu responde ba iha loron 1,000, nia hateten PAM durante ne’e fornese hela aihan nutrisaun especial ho naran Timor Vita (batar no fore keli u’ut) ba inan isin rua no inan fo susu sira hodi asegura inan no bebe sira iha nutrisaun ne’ebe diak. 

Entretantu Jerente Programa Fundasaun Alola, Maria Imaculada Guterres hateten atividade sukat liman kabun ne’ebe sira halo iha munisipiu tolu ne’e la kobre uma kain hotu, maibe uma kain balun deit. 

“Tanba ami servisu ho xefe sukus, sira mak identifika sira nia komunidade foin ami nia ekipa tuun ba sukat no husu pergunta balun ba sira kona ba status nutrisaun,” nia hateten.

Alvu ba iha peskiza ne’e, mak nia dehan bebe idade fulan neen mai kraik no inan fo susu no inan isin rua sira. 

Total uma kain ne’ebe ekipa konsege vizita mak hamutuk 16,931. 

PAM mak ajensia humanitarian ne’ebe mak luta kontra hamlaha iha mundu. 

Fundasaun Alola mak organizasaun local ida ne’ebe servisu halo advokasia maka’as ba iha direitu feto no hadia status saude inan ho oan iha Timor –Leste. 

Programa ne’e hala’o husi PAM parseria ho Fundasaun Alola no organizasaun World Vision Timor –Leste ho apoiu fundus husi Agensia Koperasaun Internasional Koreanu (KOICA).