Labarik Orfanatu Gleno fahe livrus kona ba istoria Timor nian

Realidade labarik barak mak lahatene kona ba istoria Timor nian, Labarik Orfanatu husi Gleno,Distritu Ermera fahe livrus kona ba istoria Timor nian ba labarik sira hotu iha teritoriu tomak.

“Livru ne’e kria husi labarik Orfonato Gleno, sira fahe sira nia matenek, saida mak sira hatene kona ba rai Timor nudar sira nia nasaun ba ema seluk no Timor oan sira rasik, e ami sei halo copia barak hodi distribui ba biblioteka iha 13 distritus, tanba labarik sira tenke hatene istoria Timor,” koalia Diretor Arte Moris, Iliwatu Donabere, , bainhira lansa livrus ne’e, (01/06), iha Comoro, Dili.

Tuir nia, livrus ho tema ‘Labarik ho Lafaek’ hetan suporta husi Arte Moris Timor-Leste, ho objetivu atu dezenvolve nafatin istoria no kultura Timor nian iha future.

Livrus  ho lingua Tetun no Ingles ne’e alende fahe gratuita ba biblioteka iha 13 distritus mos sei fa’an ba organizasaun sira, hanesan Fundasaun Alola inklui mos ema individu sira.

“Fundasaun Alola sosa rihun ida resin, atu distritbui ba iha ensino baziku iha rai laran ho presu $10,00 kada livru, no ba ema individu ne’ebe hakarak sosa, bele sosa iha ami nia fatin Arte Moris, ho presu $5,00. Livrus versaun Ingles sei fa’an iha Australia ho presu $20,00 kada livru,” Diretor ne’e informa.

Iha fatin hanesan Eis Prezidente da Republika, Jose Ramos Horta ne’ebe lansa livru ne’e, fo parabens ba organizasaun Arte Moris ne’ebe durante ne’e fo ona nia kontribuisaun hodi hanorin labarik sira kona ba dezenho, muzika no promove kultura Timor nian iha nasaun seluk, e tenke halo kopia barak nune’e bele distribui ba labarik sira iha eskola no komunidade sira iha area remotas. 

“Hau hanoin Alola Foundation hola ona rihun ida resin ne’e diak, hau sei koalia ho Primeiru Ministru para governu ho UNICEF bele sosa mos atu fahe ba labarik sira no komunidade sira iha area remotas, tanba ita hotu hatene iha foho livrus ba labarik laiha,” dehan Eis Prezidente Horta.  

Horta esperansa katak, labarik sir abele kontente liu tan ho livrus ida ne’e. “Bainhira hakerek istoria ida no produs livru ida maibe la promove no distribui ba komunidade sira ita sente la kontente, e espera katak labarik sira kontente lee livru ne’e, tanba livru ne’e kona ba istoria Timor nian,” Horta esperansa.*