- Publika iha: 22 Julho 2017
Taxa involvimentu labarik minoridade iha atividade kampanha partidus politiku kontinua aumenta maka’as, tuir rezultado observasaun Komisaun Nasional Direitu Labarik (KNDL) durante kampanha ba siklu Eleisaun 2017 nian.
Komisaria Direitu Labarik, Maria Barreto hateten labarik sira partisipa iha atividade kampania tanba sira interese no fanatik ba lider partidus nian ne’ebe sai hanesan lider nasional.
Nia dehan, involvimentu labarik iha atividade kampanha aberta, barak liu Partidu Libertasaun Popular (PLP), CNRT, FRETILIN, no PD.
Nia informa, iha rekomendasaun KNDL nian ba atividade kampanha sira iha futuru, importante partidus politiku kria fatin espesifiku ba labarik sira.
“Labarik sira simpatia ba lider sira, entaun ita hanoin oinsa partidu politiku sira organiza fatin atu akumula labarik sira nune’e antes halo kampanha, lider sira visita uluk labarik sira,” nia hateten iha Farol Dili.
Nia rekonese, bainhira laiha kondisaun sira hanesan ne’e susar atu minimiza labarik sira iha atividade kampanha aberta partidu politiku sira.
Durante kampanha aberta, nia dehan partidu politiku sira iha area balun mosu duni violensia ki’ik sira, maibe la fo impaktu ba labarik sira.
“Laiha keixa ruma kona ba violensia hasoru labarik,” nia hatutan.
Nia informa, asaun positiva ne’ebe partidus politiku halo mak barak mak iha ona konsiensia atu fo protesaun ba labarik sira durante kampanha.
Tuir observasaun Jornalista TDW iha terenu, haree katak mobilizador partidu politiku balun lori kareta trek ba para iha bairo-bairo hodi tula militantes ba tuir kampanha, entaun labarik sira mos foti oportunidade ida ne’e tuir partidu halo konvoiu.
Alende ne’e, iha mobilizador partidus politiku mos fahe atributu partidu nian ba labarik sira hanesan kaus no bandeira partidu nian uza hodi tuir konvoiu.
Iha sorin seluk, involvimentu labarik nian barak mos iha kampanha sira door to door iha komunidade nian uma no bairo.
Iha parte seluk, komunidade Comoro Antonio Ximenes hateten atividade kampanha ne’e importante tebes ba povu, liu –liu eleitores atu rona programa politiku partidus politiku nian ba iha dezenvolvimentu rai laran nian atu hili partidu ne’ebe merese tuir konsiensia.
Nia sente, triste bainhira mobilizador partidus politiku involve labarik iha atividade kampania no konvoiu, tanba labarik la’os eleitores, sira nia idade seidauk to’o.
“Problema ki’ik sira hanesan ne’e presiza fo atensaun hodi evita, la akontese violensia ne’e diak, maibe akontese violensia ruma labarik mak sei vulneravel liu,” nia hateten.
Nia hateten, importante atu halo prevensaun liu –liu kria baze legal ruma atu bandu partidus politiku sira mobiliza labarik no fo mos kibi’it ba polisia atu halo atuasaun ruma bainhira involve labarik inklui fo responsabilidade ba inan-aman sira atu tau matan ba labarik sira.