Hanorin Estudantes Moris Saudavel Liu Husi Aplika Saude Eskolar

Diretor Nasional Asaun Sosial Eskolar husi Ministeriu Edukasuan, Belchior Maria Almeida Guerra hateten presiza tebes estudante sira aprende kona ba saude hijiene, tanba liu husi ida ne’e sira hatene oinsa mak moris moos no saudavel.

Nia hateten, Ministeriu Edukasaun liu husi Diresaun Asaun Sosial mak responsabiliza ba programa saude eskolar ne’ebe servisu hamutuk ho Ministeriu Saude e saude eskolar la’os ba deit nivel ensino baziku maibe to’o sekundariu jeral no vokasional hotu.
“Sira tenke hatene saida mak saude hijiene, katak lor-loron sira mai tenke haris ,tenke fase liman antes atu simu merenda eskolar,liman kukun labele naruk, hatais diak no moos, atu nune’e sira bele hadook aan husi moras baziku sira, liu liu mear, inus been no moras baziku seluk tan,” nia hateten, iha Dili.
Enkuantu ba nivel pre-sekundariu no sekundariu sira, nia dehan koalia liu kona ba saude reprodutiva, atu estudante bele konese sira nia aan rasik, no buat ne’ebe mak mosu iha sira nia isin lolon tantu feto tantu mane.
“Tanba sira nia idade aumenta no buat barak mos mosu iha sira nia isin lolon, ida ne’e mak ita fo hanoin ba sira,” nia hateten.
Enkuantu programa saude eskolar hahu implementa iha inisiu 2007 no to’o agora sei la’o ho diak.
Entretantu Koordenadora Ensino Baziku Filial (EBF) Vila-Verde, Adelaide de.J.B Martins hateten programa ida ne’e diak, tanba liu husi ida ne’e estudante sira hatene diak liu tan saida mak saude hijiene.
“Nune’e sira bele hado’ok aan husi moras sira ne’ebe fo impakto ba sira nia saude,” nia hateten.
Tanba ne’e, nia parte fo agradese ba iha ministeriu rua ne’ebe implementa ona programa ida ne’e, hodi estudante sira bele konese no hatene liu tan saude hijiene.
Iha sorin seluk Sekretario Jeral rede edukasaun Timor-Leste Coalition for Education (TLCE), Jose Monteiro hateten kooperasaun ne’ebe diak entre ministeiru rua ne’e liu husi programa saude eskolar hodi eduka estudante sira moris saudavel.
“Tenke kontinua, atu nune’e ita nia estudante sira hatene moris moos no saudavel,” nia sujere.
Kona ba saude reprodutiva iha nivel ensino sekundariu, nia dehan ne’e diak liu tan atu sir abele hatene no konese sira nia aan ho diak, hodi hatene tau aan. n