Esforsu Inan-Amana Harii Moru Eskola EBC Nian Prontu Ona

Liu hosi esforsu Diresaun ho Konsello Pais, Eskola Ensino Baziku Sentral (EBC) 30 de Agostu iha ona moru eskola nian hodi fo protesaun no asegura estudantes inklui professor sira ne’ebe hanorin iha eskola ne’e ho seguru hafoin tinan barak nia laran eskola ne’e laiha moru.

Diretor eskola EBC 30 de Agosto Filomeno Salsinha hateten moru eskola ne’e hamrik tanba kontribuisaun inan-aman estudante sira ne’ebe eskola iha ne’e, kada estudantes kontribui $3.
Nia hateten, iha 26 de Agosto 2017 parte eskola hamutuk ho reprezentante Konselho do Pais no ho inan-aman estudantes halo sorumutu hodi fo kontribuisaun, tanba eskola ne’e sei presiza fasilidades balun ne’ebe governu mesak labele halo buat ida, tanba orsamentu limitadu.
“Iha enkontru ne’e inan-aman sira deside no konkorda fo kontribuisaun $3 kada estudantes hodi tulun eskola ba prosesu aprendizajen hodi bele la’o diak,” nia hateten, iha Comoro, Dili
Enkuantu total osan ne’ebe kontribui husi inan-aman, nia hateten hamutuk $5300 no osan ne’e uza hodi halo moru eskola nian ne’ebe agora prontu ona e estudantes bele ona tuir aprendizajen ho seguru.
“Ami nia alunus iha eskola ne’e hamutuk 2000, maibe 1700 resin deit mak fo kuntribuisaun no sira seluk la iha osan. Osan ne’e eskola kobra tiha depois entrega ba Konselho inan-aman atu responsavel ba osan ne’e ho sira rasik mak hahu serviso ba lutu ne’e,” nia afirma.
Nia informa, agora lutu ne’e pronto ona maske seidauk pinta, maibe inan-aman sira ne’ebe iha konselho estudante ne’e aprezenta ona ba Ministerio Edukasaun liu husi edukasaun munisipio Dili hodi entrega ba eskola.
“Lutu ne’e hamrik murni kontribuisaun husi inan aman sira, sira mak fo osan no sira rasik mak kaer osan ne’e hodi halo serviso, total orsamento $5300 ne’e uza deit ba lutu eskola nian,”nia informa.
Portantu Madalena de Jesus, nudar inan ida ne’ebe nia oan eskola iha eskola ne’e sente kontente tanba ikus mai moru ne’e hamrik dunik.
“Ami hakarak ami nia oan sira tuir aprendizajen ho seguru,” nia hateten.
Nia mos, husu ba parte eskola atu xave metin portaun bainhira alunu sira tama hotu ona iha klase, nune’e ema liur labele asesu ba iha eskola laran.
Iha sorin seluk Mestra Domingas Barreto hateten durante ne’e eskola sempre hasoru problema, ema liur bele tama to’o eskola laran tanba moru eskola laiha.
“Uluk, bainhira iha problema oituan, alunu ba bolu nia familia e familia mai tama liu eskola laran hodi baku professor, tanba lutu ne’e seidauk iha, maibe agora diak ona,” nia hateten.