Segunda, Fevereiro 19, 2018
Total visitors: 196285

Labarik ho idade (0-17) hamutuk 61.749 identifikadu merese hetan apoiu subsidio Bolsa da Mae husi governu iha tinan 2017, tanba familia ekonomikamente la sufsiente suporta ba eskola.

Labarik 61 749 (husi familia kbi’it la’ek) mak identifikadu atu no simu subsidiu Bolsa da Mae ba tinan 2017 nian.

Diretor Nasional ba Asistensia Sosial iha Ministerio Solidaridade Sosial (MSS), Mateus da Silva hateten pagamentu tarde tanba governu sei halo re-ajustamentu ba iha dadus.
Nia dehan, lista benefisiarios haruka kedas ona ba iha Banku Nasional Comersio Timor-Leste (BNCTL) iha tinan kotuk (2017) atu halo pagamentu iha fulan Novembru no Dezembru, maibe la konsege tanba halo uluk pagamentu ba idozu no funsionario publiku sira.
“Ita simu ona karta ida husi BNCTL katak sira sei halo pagamentu iha segunda semana ne’e ba benefisiario tuan sira, portantu ba foun sira sei iha segunda faze,” nia hateten, iha nia servisu fatin Vila Verde, Dili.
Iha prosesu re-ajustamentu dadus ne’e, nia dehan konsege esklui benefisiario rihun lima (5000) resin, tanba sira nia idade liu ona tinan 17, forma uma kain no balun mos mate ona.
Nia informa, iha tinan 2016 total benefisiario hamutuk rihun lima nulu resin ida, maibe depois halo re-ajustamentu dadus, konsege identifika nain rihun hat nulu resin lima maka merese hetan subsidio ne’e.
Alende ne’e, nia dehan sira mos halo registu foun ba benefisiarios tinan 2017 nian hamutuk rihun sanulu resin lima, entaun numeru ne’e sa’e ba 61.749.
Nia informa, total Orsamentu Jeral do Estado 2017 ne’ebe alokadu ba iha programa Bolsa da Mae hamutuk $9.900.000, 00. No konsege ezekuta deit $8.972,400 ba benefisiario hamutuk nian 61.749.
Iha parte seluk, benefisiario Jose Amaral hateten tinan 2017 sira seidauk hetan sira nia direitu no laiha informasaun ida klaru husi official MSS nian.
“Ami lahatene subsidio ida ne’e sei iha ga la’e, tanba tinan 2017 nian ami seidauk simu,” nia hateten
Nia dehan, subsidio ida ne’e ajuda tebes sira hodi sosa nesesidade eskola nian hanesan kadernu, farda no seluk tan.
Nia hatutan, bainhira subsidio ne’e laiha, sira tenke ajuda halo servisu ruma atu hetan osan oituan hodi sosa sira nia nesesidades.

E-mail Subscription

Enter your email address:

    Poll

    Nothing found!

    Follow us on Twitter