Jovens Sei Menus Informasaun Ba Saude Reprodutivu

Organizasaun Movimentu Feto Foinsa’e (MOFFE) konsidera foinsa’e barak mak sei menus konesementu kona ba asuntu saude reprodutivu no seksual, tanba sosializasaun informasaun husi Ministeriu da Saude.

Diretora MOFFE, Yasina Lujina hateten edukasaun promosaun saude ne’ebe durante ne’e ekipa Ministerio da Saude halo haree liu ba ema adulto, liu –liu inan isin rua sira tanba koalia liu kona ba planeamentu familia.
Nia dehan, edukasaun saude reprodutivu foinsa’e ne’e asuntu ida ne’ebe importante tebes atu bele kontribui ba iha redusaun problema isin rua sedu, kaben sedu no moras hada’et husi relasaun seksual ne’ebe komesa registu maka’as iha fasilidade saude sira.
“Kondisaun foinsa’e ho ema adulto hanesan ita, presiza aprosimasaun diferente atu sira bele fiar no nakloke koalia sai problema ne’ebe sira infrenta no tulun ne’ebe sira presiza, se la’e sira sei nonok e problema la rezolve,” nia hateten iha servisu fatin Farol, Dili.
Alende ne’e, nia dehan problema ne’ebe sira identifika mak iha fasilidade saude laiha fatin espesifiku ba foinsa’e sira atu halo akonselamentu ba moras ne’ebe afeita ba sira nia orgaun reprodutivu sira.
Tanba ne’e, nia husu ba ministerio atu konsidera kestaun ida ne’e, liu-liu estabelese sentru akonselamentu ba foinsa’e sira iha fasilidade saude hotu atu bele fasilita sira hato’o sira nia problema.
Nia hateten, kestaun etika atendimentu sai nafatin problema liu –liu komunikasaun pesoal saude nian ne’ebe perturba foinsa’e sira, halo sira moe atu hateten sai problema ne’ebe sira infrenta hela.
Iha oportunidade ne’e, nia husu ba Ministerio da Saude atu apoia Ministerio Edukasaun hodi implementa kurikulum saude reprodutivu iha prosesu aprendizajen, atu foinsa’e sira bele iha konesementu ne’ebe klean ba sira nia orgaun reprodutiva ho nia funsaun sira, no risku sira ne’ebe akontese bainhira la kuidadu ho diak.
Iha tinan kotuk, organizasaun MOFFE hetan fiar husi governu liu husi Gabinete Primeiru Ministru nian hodi halo auditorio social ba iha implementasaun programa edukasaun saude reprodutivu no seksual.
Entretantu, Diretora Saude Munisipio Dili Agustinha da Costa Seguerado rekonese kondisaun fasilidade la favoravel ba foinsa’e sira atu halo komunikasaun ida interna ho pesoal saude sira kona ba problema ne’ebe sira infrenta liga ba orgaun reprodutiva, maibe atendimentu ba saude foinsa’ e sira nian disponivel iha fasilidade saude hotu.
“Ita nia fasilidade sira iha saude munisipio Dili seidauk 100% atu halo fatin espesifiku, maibe atendimentu ba saude foinsa’e ne’e ita lao hela durante ne’e,” nia hateten.
Edukasaun saude reprodutiva ba foinsa’e sira la’o hela, maibe nia hateten presiza regularmente no espesifiku liu tan ba foinsa’e sira atu sira bele iha konesementu ne’ebe diak no lolos ba funsaun orgaun reprodutiva sira no riskus.