Hapara Labarik Fuma Sigaru, Seidauk Iha Baze Legal

Atu hapara labarik ne’ebe gosta fuma sigaru, Governu liu husi Ministeriu Saude (MS)Timor-Leste seidauk iha baze legal ruma hodi proteje labarik sira ne’e.

“Espesifikamente ita seidauk iha regulamentu ida maibe ita espera katak iha futuru governu liu husi ministeriu relevante bele halo prevensaun ba labarik sira ne’ebe konsume sigaru,” dehan Xefe Departamentu Protesaun Labarik Ministerio Solidaridade Sosial (MSS), Florencio Gonzaga, iha Kaikoli, Dili.
Maske nune’e nia garante bele redus numeru labarik consume sigaru, tanba TL laiha fabrika sigaru no durante ne’e halo importasaun husi nasaun seluk.

Nia mos rekonese katak, durante ne’e sira ladun halo advokasia ba komunidade kona ba impaktu husi fuma sigaru liu-liu labarik minoridade sira, maibe ida ne’e kompetensia husi MS.

Iha parte seluk Reprezentante Organizasaun Saude Mundial (WHO) iha Timor-Leste, Doutor Jorge Mario Luna hateten bazeia ba dadus Demographic Health Survey tinan 2006 hatudu katak 15 pursentu (15%) labarik feto no mane iha eskola koko fuma sigaru. “ida ne’e numeru ne’ebe as tebes no difisil atu redus tanba laiha regulamentu ida atu bele kontrola negosiente sigaru sira iha Timor laran,”.

“Bainhira ita la’o iha estrada ita hare labarik minoridade sira fuma sigaru no inan aman sira haruka sira ba hola sigaru, entaun sira mos aprende fuma tanba ne’e laiha lei ou regulamentu ida atu regula ida ne’e ita labele halo buat ida,” dehan Doutor Luna.