40 pursentu Labarik hetan moras tanba halo servisu todan

Bazeia ba dadus peskiza ne’ebe fo sai husi International Labor Organization (ILO) iha fulan hirak liu ba hatudu katak 40 pursentu (40%) labarik ho idade minoridade (7-17 anos) hetan moras tanba halo servisu todan hodi ajuda inan aman sira.
“Hanesan aileba, fa’an sasan gerobak, fase kareta no seluk tan, hau hanoin ida ne’e preokupasaun ida ne’ebe inan aman sira no ema hotu tenke kombate, maibe asuntu ida ne’e ba empregada ema seidauk fo atensaun maka’as,” hateten Sekretaria Estadu Promosaun Igualidade (SEPI), Idelta Maria Rodrigues, (26/07), iha Hotel Timor, Dili.

Sekretaria Estadu hatutan, labarik sira ne’e nia tinan sei  ki’ik e sira iha direitu atu ba eskola maibe tanba situasaun ekonomia la sufsiente, obriga sira tenke hala’o servisu e ikus mai hetan moras. 
Iha fatin hanesan Diretora Feto Ki’ik Servisu Hamutuk (FKSH), Gisela de Carvalho katak, Timor-Leste ratifika ona Konvesaun Direitu ba Labarik no iha konvensaun ne’e bandu labarik sira atu halo servisu todan.

“Hau nia hanoin governu no organizasaun internasional no nasional sira ne’ebe luta ba direitu labarik presiza halo advokasia makas ho inan aman sira  atu bele minimize trabalho infantil tanba labarik sira mak futuru ba nasaun ida ne’e nian,” dehan Diretora  ne’e.

Iha parte seluk Membru Parlamentu Nasional, Deputada Josefa Alvares Soares hateten problema labarik nian barak tebes hanesan malnutrisaun, falta atensaun husi inan aman inklui mos falta ekonomia iha uma laran.

“Hau mos dala barak koalia halimar ho labarik sira ne’ebe fa’an iha estrada ninin, e sira hatan katak sira  gosta halao servisu sira hanesan ne’e, dala ruma ema seluk aproveita sira nia badinas ne’ebe iha hanesan fase kareta,” dehan Deputada Soares.