Durante Tinan Lima, SEFOPE kapasita Joventude 40.351

Sekretariu Estadu Formasaun Profesional e Empregu (SEFOPE) durante tinan lima iha nia mandatu konsege fo kapasitasaun ba joventude hamutuk 40.351 iha Sentru Formasaun sira ne’ebe kobre iha rai laran.
“SEFOPE iha tinan lima nia laran halo duni nia servisu ho susesu ne’ebe bo’ot ,atinji objetivu ne’ebe importante tebes hodi hasa’e kapasidade ita nia joventude lubuk bo’ot ida no kria kampu de trabalhu ne’ebe fasilita ita nia komunidade sira iha areas rurais liu-liu infrastrutura baziku,” hateten SE Bendito do Santos Freitas, iha lansamentu relatoriu servisu SEFOPE nian durante tinan lima, iha Sentru Konvesaun Dili (31/7).

Nia dehan, husi numeru ne’e joventude barak mak hetan ona servisu iha Instituisaun Nasionais, setor privado e balun mos ba servisu iha liur kona ba industria espesifika, hanesan iha Korea de Sul no Australia.

Iha mos objetivu ba lansamentu livru ida ne’e mak, atu refleta patrikularmente tinan lima progresu ne’ebe SEFOPE atinji hamutuk ho komunidade sira, liu-liu kona ba atendimentu servisu iha areas Empregu, Formasaun Profesional no trabalhu ne’ebe importante tebes atu publiku hatene progresu ne’ebe SEFOPE halo no implementasaun osamentu estado nian.

Alende ne’e SEFOPE mos estabelese Institutu Dezenvolvimentu Maun de Obra atu fo akreditasaun ba Sentru Formasaun hotu, hodi garantia kualidade formasaun ba joventude.

Iha fatin hanesan Primeiru Ministeru Interina, atual Sekretaria Estadu Promosaun Igualidade (SEPI), Idelta Maria Rodrigues husu ba SEFOPE ho parseirus sira atu nafatin fo kapasitasaun ba joventude sira iha teritorio tomak, nune’e bele kompete ho ema estrangeiru sira iha merkado servisu.

“Ho deit haruka joventude sira ba servisu iha rai liur ne’e seidauk to’o, presiza kapasita nafatin tanba joventude sira mak sai pilar importante ba dezenvolvimentu nasional,” dehan SE Rodrigues.

Tanba ne’e tuir nia, ho lansamentu relatoriu tinan lima no website ne’e buat ne’ebe importante tebes, nune’e ema hotu bele hare direitamente progresu no dezafiu ne’ebe SEFOPE halo no infrenta iha tinan lima ne’e.